गरिमा विकास बैंकले सहारालाई प्राप्ति गरी कात्तिक २८ गतेदेखि एकीकृत कारोबार शुरु गर्ने

१३ कार्तिक, काठमाडौं ।  गरिमा विकास बैंक लिमिटेडले साहारा विकास बैंक लिमिटेडलाई प्राप्ति (एक्विजिशन) गरी कात्तिक २८ गतेदेखि एकीकृत कारोबार शुरु गर्ने भएको छ ।

गरिमा विकास बैंकको भदौ १५ गते र सहारा विकास बैंकको भदौ १२ गते बसेको छुट्टाछुट्टै साधारण सभामार्फत दुवै कम्पनीले प्राप्ति सम्बन्धी प्रस्ताव पारित गरेका थिए ।

नेपाल राष्ट्र बैंकले कात्तिक १ गते र कम्पनी रजिष्ट्रार कार्यालयले कात्तिक ११ गते प्राप्तिका लागि अन्तिम स्वीकृति पश्चात दुवै कम्पनीले एकीकृत कारोबार गर्न लागेका हुन् ।

दुवै कम्पनी एक भई गरिमा विकास बैंक लिमिटेडको नामबाट एकीकृत कारोबार शुरु गर्न लागेका हुन् । प्राप्ति पश्चात कम्पनीको केन्द्रिय (रजिष्टर्ड) कार्यालय काठमाडौं महानगरपालिका वडा नं. २, लाजिम्पाटमा रहने बताइएको छ ।

गरिमा विकासले सहारा विकासलाई १ बराबर १ को शेयर आदानप्रदान रेशियोमा प्राप्ति गरेको हो ।

प्राप्तिपछि लगानीकर्ताले सहारा विकासको १ कित्ता शेयर बराबर गरिमा विकासको १ कित्ता नै शेयर पाउनेछन् । सहारा विकासलाई प्राप्ति गरेपछि गरिमा विकासको चुक्तापूँजी ३ अर्ब ९४ करोड ८१ लाख ८३ हजार १०५ रुपैयाँ पुग्नेछ ।