महालक्ष्मी विकास बैंकले गर्यो २३ करोड ५ लाख मुनाफा, प्रतिशेयर आम्दानी कति ?

१६ असोज, काठमाडौं । महालक्ष्मी विकास बैंकले चालु आर्थिक वर्षको पहिलो त्रैमासमा २३ करोड ५ लाख रुपैयाँ मुनाफा आर्जन गरेको छ । यो गत आर्थिक वर्षको यसै अवधिको तुलनामा ४४.२८ प्रतिशतले बढी हो ।

बैंकले गत आर्थिक वर्षको यहि अवधिमा १५ करोड ९७ लाख रूपैयाँ मात्रै मुनाफा आर्जन गरेको थियो ।

त्यसैगरी, बैंकको खुद ब्याज आम्दानी ४६ करोड ३७ लाख रहेको छ । त्यस्तै, नेट फि तथा कमीशन आम्दानी ६ करोड ७ लाख र सञ्चालन मुनाफा ५१।४७ प्रतिशत बढेर ३४ करोड ५७ लाख पुगेको छ ।

बैंकको इम्पेरमेन्ट चार्जमा केही कमी आएका कारण पनि बैंकको नाफा बढ्न टेवा पुगेको देखिन्छ । चुक्ता पूँजी ३ अर्ब ३४ करोड रुपैयाँ रहेको बैंकको जगेडा कोषमा १ अर्ब ७० करोड संञ्चित रहेको छ ।यस अवधिमा बैंकको निक्षेप ३.०४ प्रतिशत र कर्जा ५.८४ प्रतिशतले बढेको छ ।

खुद नाफासँगै बैंकको प्रतिशेयर आम्दानी पनि बढेको छ । बैंकको प्रतिशेयर आम्दानी ६ रुपैयाँ ७९ पैसाले बढेर २७ रुपैयाँ ५९ पैसा पुगेको छ । यस्तै बैंकको प्रतिशेयर नेटवर्थ १७१ रुपैयाँ ६५ पैसा रहेको छ ।