मुक्तिनाथ विकास बैंकले गर्यो तीन वाणिज्य बैंकको भन्दा धेरै मुनाफा

१६ कार्तिक, काठमाडौं । मुक्तिनाथ विकास बैंक लिमिटेडले चालु आर्थिक वर्षको पहिलो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार बैंकको मुनाफा बढेको छ।

चालु आर्थिक वर्षको असोज मसान्तसम्ममा बैंकले ३४ करोड ५५ लाख रुपैयाँँ मुनाफा आर्जन गरेको छ। यो गत आर्थिक वर्षको सोही अवधिको तुलनामा १७.४८ प्रतिशत बढी हो। मुक्तिनाथ विकास बैंकले पहिलो त्रैमासमा तीन वाणिज्य बैंकको मुनाफालाई पछि पारेको छ ।

गत आर्थिक वर्षको सोही अवधिसम्ममा बैंकले २९ करोड ४१ लाख रुपैयाँ मुनाफा आर्जन गरेको थियो।

पहिलो त्रेमाससम्ममा बैंकको खुद ब्याज आम्दानी र सञ्चालन आम्दानी बढेसँगै नेट फि कमिसन उल्लेख्य बढ्दा बैंकको नाफा बढ्न टेवा पुगेको हो।

यस अवधिमा बैंकको खुद ब्याज आम्दानी ४१.८३ प्रतिशत बढेर ८३ करोड ७६ लाख पुगेको छ भने सञ्चालन मुनाफा १७.४८ प्रतिशत बढेर ४९ करोड ३६ लाख पुगेको छ । बैंकको नेट फि तथा कमिशन आम्दानी भने समीक्षा अवधिमा ६१.०६ प्रतिशत बढेको छ। असोज मसान्तसम्ममा बैंकको वितरण योग्य मुनाफा ९५ करोड ६३ लाख रुपैयाँ रहेको छ।

चालु आर्थिक वर्षको तीन महिनामा बैंकको जगेडा कोष १६.०२ प्रतिशतले बढेको छ। त्यसैगरी, बैंकको निक्षेप ११.८१ प्रतिशतले बढेको छ भने कर्जा १६।६६ प्रतिशतले मात्र बढेको छ।

बैंकको प्रतिशेयर आम्दानी २८ रुपैयाँ ७३ पैसा कायम भएको छ भने प्रतिशेयर नेटवर्थ १४८ रुपैयाँ १४ पैसा रहेको छ।