आज ४६९ संक्रमित थपिए, तीन जिल्लामा शून्य संक्रमण

१६ कार्तिक, काठमाडौं । पछिल्लो २४ घण्टामा नेपालमा कोरोना भाइरसका ४६९ जना संक्रमित थपिएका छन् । स्वास्थ्य तथा जनसङ्ख्या मन्त्रालयले आज सार्वजनिक गरेको बुलेटिनमा १० हजार २८७ मा कोरोना परीक्षण गर्दा ४६९ संक्रमित थपिएका हुन् ।

सोमबार ५३३ जनामा संक्रमण देखिएको थियो । देशभर सक्रिय संक्रमित नौ हजार १७४ रहेका छन् । नेपालमा संक्रमण दर १८.३ प्रतिशत पुगेको छ । पाँच सयभन्दा बढी संक्रमित त भएका जिल्ला काठमाडौं, ललितपुर र भक्तपुर तथा २०० भन्दा बढी सङ्क्रमित भएका जिल्ला १० रहेका छन् ।

तीन जिल्लामा शून्य संक्रमण

यसैगरी संक्रमित शून्य रहेका जिल्लामा मनाङ, हुम्ला र मुगु छन् । मन्त्रालयका अनुसार पछिल्लो २४ घण्टामा ५५५ जनाले कोरोना भाइरसको संक्रमणबाट स्वास्थ्य लाभ गरेका छन् । योसँगै अहिलेसम्म नेपालमा संक्रमणबाट मुक्त हुनेको सङ्ख्या सात लाख ९२ हजार ८३२ पुगेको छ । नेपालमा संक्रमणमुक्त हुने दर ९७.५ प्रतिशत रहेको छ ।

यसैगरी आज कोरोना संक्रमणबाट ११ जनाको निधन भएको छ । अहिलेसम्म संक्रमणबाट ११ हजार ४२७ को निधन भएको छ । मंगलबार ८० हजार ८१८ ले कोरोना भाइरसविरुद्धको खोप लगाएका छन् । नेपालमा अहिलेसम्म ८६ लाख ७९ हजार १९८ ले पहिलो मात्रा र ७३ लाख २४ हजार ९२९ ले पूर्ण मात्रा खोप लगाएका छन् ।