जुवा सम्बन्धि अपराधको घटनामा वृद्धि

२४ कार्तिक, नवलपुर । पछिल्लो समय जुवा सम्बन्धि अपराधको घटनामा वृद्धि भएको पाइएको छ । चाडपर्व शुरु भएपछि जुवातास खेल्ने र खेलाउने कार्य बढन सक्ने भन्दै प्रहरीले निगरानी समेत बढाएको छ ।

दैनिकजसो जुवा सम्बन्धि अपराधका घटनामा संलग्न रहेका व्यक्तिलाई प्रहरीले नियन्त्रणमा लिएको खवर आउने गरेका छन् । नवलपुर प्रहरीले आ.व २०७६/७७ मा भन्दा तुलनात्मक रुपमा गत आ.व ०७७/७८ मा धेरै जुवा सम्बन्धि अपराधको घटना बाहिर आएको हो ।

आ.व २०७६/७७ मा ८ वटा मात्रै जुवा सम्बन्धि मुद्दा कारवाही अगाडी बढाएको प्रहरीले गत आ.व ०७७/७८ मा ५३ वटा मुद्दामा कारवाही अगाडी बढाएको हो । चाडपर्व, मेलापर्व, मेलापत साथै विविध धार्मीक तथा सास्कृतिक पर्वका नाममा जुवा खेल्ने तथा लुकिछिपी प्रहरीको गतिविधी नियाल्दै खेलाईने गरेको स्थानबाट धेरै मात्रामा जुवाडेहरु पक्राउ परेको जिल्ला प्रहरी कार्यालय नवलपुरका प्रमुख प्रकाश मल्लले बताए ।

केहि दिन अघि मात्र कावासोती ,देवचुली र हुप्सेकोटबाट तास खेलिरहेको अवस्थामा जुवाडेलाई प्रहरीले नियन्त्रणमा लिएको छ । नगद र तास सहित पक्राउ परेका उनीहरुलाई मुलुकी अपराध संहिता २०७४ को परिच्छेद ५ को दफा १२५ बमोजिम कसुर अन्तर्गत अनुसन्धान कार्य अघि बढाईएको जिल्ला प्रहरी कार्यालयका प्रवक्ता दिलिपकुमार गिरीले
जानकारी दिए ।