इन्टर्नसीपको माग गर्दै मेडिकल काउन्सिलमा प्रदर्शन

१५ मंसिर, काठमाडौं । चीनमा एमबीबीएस अध्‍ययन गरेरका विद्यार्थीहरुले नेपालमा इन्टर्नसीप गर्न पाउनुपर्ने माग राख्दै प्रदर्शन गरेका छन् ।

नेपाल मेडिकल काउन्सिल अगाडी चिकित्साशास्त्र कोर्ष पूरा गरेका विद्यार्थीले इन्टर्नसीपको लागी माग गरेपनि कुनै सुनुवाइ नभएको भन्दै प्रर्दशनमा उत्रिएका हुन् । नेपाल मेडिकल काउन्सिलले २०१५ र १६ औं व्याजका चीनमा अध्ययन पूरा गरेका विद्यार्थीहरुलाई नेपालमा इन्टर्नसीप गर्नको लागि स्वीकृति नदिए पछि उनीहरु आप्नो माग पुरा हुनुपर्ने माग राख्दै प्रदर्शन गरेका हुन् । विद्यार्थीहरुको अन्तिम वर्षको सैद्घान्तिक कक्षा केही समय बाँकी रहेको र त्यो अनलाईन कक्षाबाट पूरा गरेकाले इन्टर्नसीप गर्न पाउनुपर्ने माग राख्दै आएका छन् ।

चीन सरकारको छात्रवृतिमा पढ्न गएका विद्यार्थीको ६ महिना, बाईलिङिग्वील (द्विभाषिक) युनिभर्सिटीमा पढ्न गएकाहरुको ९ महिना र अंग्रेजी माध्यमको विश्वविद्यालयमा पढ्न गएकाहरुको तीन महिना सैद्घान्तिक कक्षा कोभिडका कारण प्रत्यक्ष पढ्न पाएका थिएनन् । ती बाँकी रहेका सैद्घान्तिक कक्षा उनीहरुले अनलाईन मार्फत पढेर परीक्षा समेत दिइसकेको दाबी गरेका छन् ।

तर काउन्सिलले गत १० गते सूचना जारी गर्दै ‘सन् २०१६ र त्यसपछि भर्ना भएकाहरुको हकमा प्रयोगात्मक कक्षा बिना गरिएको अनलाईन अध्ययन अवधिलाई मान्यता दिन नहुने ।’ भनेको छ ।