केन्द्रीय बैंकले २५ अर्बको ट्रेजरी बिल खरीद गर्दै

१६ मंसिर, काठमाडौं । नेपाल राष्ट्र बैंकले २५ अर्ब रुपैयाँको ट्रेजरी बिल खरीद गर्ने भएको छ । बैंकले सूचना जारी गर्दै बिहीबार ट्रेजरी बिल खरिद उपकरण बोलकबोल प्रक्रियाबाट गर्ने गरी आह्वान गरेको हो ।

फागुन मसान्तसम्म भुक्तानीको मिति तोकिएको ट्रेजरी विक्री गर्न चाहाने बैंक तथा वित्तीय संस्थाले बिहीवार २ बजेसम्म बोलकबोलमा भाग लिन पाउने केन्दीय बैंकले बताएको छ । बैंकले प्राप्त आवेदनका आधारमा शुक्रवार ट्रेजरी खरीद गर्नेछ ।

बैंकका अनुसार बैंकिङ प्रणालीमा न्यून तरलताको स्थिति देखिएमा तरलता प्रवाह गर्न प्रयोग हुने उपकरण ‘सोझै खरीद’ हो । यो उपकरणको केन्द्रीय बैंकले तोकिएको दिन भित्र भुक्तानी मिति भएका ट्रेजरी बिल इच्छुक बैंक तथा वित्तीय संस्थाबाट बोलकबोल माध्यमबाट खरीद गर्दछ र त्यस बापतको रकमा ती बोलकर्तालाई भुक्तानी गर्ने भएकाले बैंकिङ प्रणालीमा तरलता प्रवाह हुन्छ ।

राष्ट्र बैंकले प्रणालीमा तरलताको चाप पर्दा यस्ता उपकरणको निरन्तर प्रयोग गर्दै आएको छ । बैंक तथा वित्तीय सस्थाले स्थायी तरलता सुविधा, रिपोजस्ता उपकरणको प्रयोग गरिरहे पनि तरलता व्यवस्थापन सहज हुन सकेको छैन ।

बैंकको औषत कर्जा निक्षेप अनुपात मौद्रिक नीतिले ९० प्रतिशत हुनुपर्ने व्यवस्था गरे पनि बढेर ९० दशमलव ८५ प्रतिशत पुगेको छ । यसले बजारमा लगानीयोग्य रकमको अभाव रहेको पुष्टि हुन्छ ।