छविराज ओझा नयाँ फिल्म बनाउने तयारीमा

१६ मंसिर, काठमाडौं । चलचित्र निर्मता छविराज ओझा नयाँ फिल्म बनाउने तयारी गरेका छन् । ओझाले आफ्नो ५७ औं जन्मदिनको अवसर पारेर नयाँ फिल्म निर्माणको घोषणा गरेका हुन् ।

निर्माण गर्न लागेको चलचित्रको नाम नखुलाई ओझाले स्क्रिप्ट र गीतमा काम भइरहेको बताइएको छ । छविको चलचित्र ‘मंगलम’को ‘पर्खपर्ख मायालु’ बोलको गीत संगीतकार दीपक शर्माले कम्पोज गरेका थिए र गीत निकै हिट भएको थियो।

ओझाको नयाँ फिल्ममा पनि संगीतकारका रुपमा दीपक नै आबद्ध भएका छन्। गीतमा प्रविशा अधिकारी र डेबिड शंकरले स्वर दिएका छन्। निर्माता ओझासँग निर्देशकका रुपमा नवराज शर्माले सहकार्य गर्दैछन्।

शर्माले यसअघि सयभन्दा बढी फिल्ममा सहायक निर्देशकका रुपमा काम गरिसकेका छन्। शर्माको पहिलो निर्देशनमा बन्न लागेको फिल्मको स्क्रिप्टमा काम भइरहेको ओझाले बताए।

दुई महिनापछि छायांकन सुरु गर्ने भनिएको फिल्मका लागि छविले कलाकार छनोट गरिरहेका छन्। द्वन्द्व र प्रेमलाई मुख्य विषयवस्तु बनाई फिल्म निर्माण गर्ने ओझा यसपटक लभस्टोरी जनरामा फिल्म निर्माण गर्दैछन्।