राजदूतसम्बन्धी संसदीय सुनुवाइ फेरि सर्‍यो

१७ मंसिर, काठमाडौं । राजदूतसम्बन्धी संसदीय सुनुवाइ फेरि सरेकाे छ ।  शुक्रबार सुनुवाइ गरिने भनिए पनि संसदीय सुनुवाइ समितिको बैठक फेरि सरेका कारण सुनुवाइ प्रभावित हुने भएकाे हाे ।

नेपाली कांग्रेसको सांसदहरु महाधिवेशनमा व्यस्त भएको कारण देखाउँदै बैठक २० गतेको लागि सारिएको छ । यसअघि मंसिर ५ गते बस्ने भनेको बैठक पनि कोरम नपुगेको भन्दै स्थगित भएको थियो ।

शुक्रबारको बैठकमा भारत, अमेरिका र बेलायतमा नियुक्तिका लागि प्रस्तावित राजदूतहरुको सुनुवाइ सुरु गर्ने भनिएको थियो । गत ११ कात्तिकमा बसेको मन्त्रिपरिषद बैठकले भारतका लागि नेपाली राजदूतमा डा. शंकर शर्मा, अमेरिकामा श्रीधर खत्री र बेलायतमा ज्ञानचन्द्र आचार्यको नाम सिफारिस गरेको थियो ।