ओमिक्रोन भेरियन्ट देखिएपछि उपत्यकामा लकडाउनबारे अन्यौल

२१ मंसिर , काठमाडौं । उपत्यकामा ओमिक्रोन भेरियन्टका दुईजना संक्रमित फेला परेपछि लकडाउन गर्ने वा नगर्ने विषयमा काठमाडौं, ललितपुर र भक्तपुर जिल्ला प्रशासनहरूले छलफल सुरु गरेका छन् ।

उपत्यकामै ओमिक्रोनका संक्रमित भेटिएपछि काठमाडौंका प्रमुख जिल्ला अधिकारी गोविन्द रिजालले संक्रमणको अवस्थाले हेरेर लकडाउन गर्ने वा नगर्ने निर्णय गरिने जानकारी गराएका छन् । उपत्यकाका तीनवटै जिल्लाका सीडीओहरूबीच यसबारेमा छलफल भने भईरहेको उनको भनाई छ ।

संक्रमितहरू बढ्दै गएको खण्डमा नियन्त्रण र केही निषेधात्मक उपाय अपनाउने उनले बताए । लकडाउनमा पनि जान सकिनेतर्फ इंगित गर्दै अहिले नै लकडाउन वा निषेधाज्ञा नगरीने उनको भनाइ थियो । जनस्वास्थ्यका मापदण्डको पालनामा पछिल्लो समय हेलचेक्र्याइँ भइरहेकोले हाललाई सामाजिक दूरी, मास्कको प्रयोगलगायत जनस्वास्थ्यका मापदण्डमा नै कडाइ गरिनुपर्ने उनको भनाइ छ ।

ओमिक्रोन भेटिएको देशबाट मंसिर ३ गते नेपाल प्रवेश गरेका एक ६६ वर्षीय विदेशी र उनको सम्पर्कमा आएका अर्का ७१ वर्षीय व्यक्तिमा संक्रमण भेटिएको सोमबार स्वास्थ्य तथा जनसंख्या मन्त्रालयले जनाएको थियो । दक्षिण अफ्रिकामा पहिलोपटक फेला परेको ओमिक्रोन भेरिअन्ट अहिलेसम्म नेपालसहित ४० भन्दा बढी देशमा फैलिसकेको छ ।

नेपालले अन्तर्राष्ट्रिय हवाई तथा स्थल नाकाहरूबाट प्रवेश गर्ने मानिसहरूलाई नेगेटिभ पीसीआर रिपोर्ट अनिवार्य गरेको छ । त्यसैगरी खोपको विवरण लिने र पूर्ण मात्रा खोप नलगाएका तथा शंकास्पद देखिए एन्टिजन परीक्षण गर्ने गरिएको स्वास्थ्य मन्त्रालयले जनाएको छ ।