कांग्रेस महाधिवेशनमा कसरी गरिदैँछ प्रतिनिधीको व्यवस्थापन

२२ मंसिर, काठमाडौं । नेपाली कांग्रेसको १४ औं महाधिवेशन मंसिर २४ को लागी तयारीका धमाधम भइरहेका छन् । मंसिर २४ कांग्रेस महाधिवेशनको उद्घाटन हुने कार्यतालिका छ । कांग्रेसले ४ सय जनालाई मञ्चमा राखेर महाधिवेशनको उद्घाटन गर्ने तयारी गरेको छ ।

कार्यतालिका अनुसार २ सय जनालाई एकैसाथ मतदान गर्ने व्यवस्था गर्न लागिएको छ । राष्ट्रियसभागृह र महेन्द्र पुलिस क्लवमा कांग्रेसले मतदान गर्न २ सय बुथ राख्ने तयारी भइरहेको नेपाली कांग्रेस काठमाडौंका सचिव गोविन्द पुडासैनीले जानकारी दिएका छन् ।

महाधिवेशनमा सहभागी हुने ४५ सय भन्दा बढि प्रतिनिधिले ब्यालेटमै मतदान गर्नुपर्ने भएको छ । एकजनालाई मतदान गर्न कम्तीमा पनि एक घण्टा भन्दा बढी लाग्ने अड्कल गरिएको छ । कांग्रेसले भोटिङ मेसिनलाई मान्यता नदिने भए पछि ब्यालेटमै मतदान गर्ने व्यवस्था गरिएको छ ।

भोटिङ मेसिनको प्रयोग गर्दा गल्तिहरु हुन सक्ने भन्दै प्रतिनिधिले ब्यालेटमै मतदान गर्नुपर्ने भएको छ । यसअघि नेकपा एमालेको चितवनमा सम्पन्न भएको १० औं महाधिवेशनमा भोटिङ मेसिनको प्रयोग गरिएको थियो । राष्ट्रिय प्रजातन्त्र पार्टी राप्रपाले पनि भोटिङ मेसिनको प्रयोग मार्फत मतदान गरेको थियो ।

१४ औं महाधिवेशनको लागी कांग्रेसले ८० फिट लम्बाइ र ४० फिट चौडाइको मञ्च बनारहेको छ ।
महाधिवेशन प्रतिनिधि बस्नका लागि तीन ठाउँमा होटल बुकिङ गरिएको छ । सुन्धारा, ठमेल र गौशालामा प्रतिनिधिलाई बस्ने व्यवस्था गरिएको हो । हालसम्म तीन हजार आठ सय प्रतिनिधिका लागि ८६ होटल बुकिङ गरिएको आवास तथा भोजन समितिका संयोजक एवं कांग्रेस केन्द्रीय सदस्य सुरेन्द्र पाण्डेले बताए । चार हजार तीन सय महाधिवेशन प्रतिनिधि बस्न मिल्ने गरी होटल बुकिङको तयारी गरिएको छ ।

समितिले महाधिवेशनमा सहभागी हुने आठ हजार व्यक्तिका लागि खानाको व्यवस्था गर्ने भएको छ । अनुपम फुडल्याण्ड, बत्तीसपुतली र दियालो फुडल्याण्ड, बसुन्धरामा भोजनको व्यवस्था गरिएको छ,’ । मंसिर २४ गते बेलुकादेखि २७ गते बेलुकासम्म खानाको व्यवस्था गरिएको छ ।