देउवाको निजी निवास बूढानीलकण्ठमा उम्मेदवारीलगायत विषयमा छलफल

२२ मंसिर, काठमाडौं । प्रधानमन्त्री एवं नेपाली कांग्रेसका सभापति शेरबहादुर देउवाले पार्टीको आसन्न १४औँ महाधिवेशन सम्बन्धमा छलफल गर्न आफ्नो समूहका नेताहरूको बैठक बोलाएका छन् ।

देउवाको निजी निवास बूढानीलकण्ठमा जारी बैठकमा महाधिवेशनको तयारी, महाधिवेशनमा पदाधिकारीका उम्मेदवारीलगायत विषयमा छलफल जारी छ । सभापति देउवाले सभापतिमा दावी गरिसकेका छन् भने, अन्य पदाधिकारीका उम्मेदवारबारे छलफल भइरहेको छ ।

बैठकमा सहभागी एक नेताका अनुसार महामन्त्रीमा प्रकाशशरण महत र विश्वप्रकाश शर्माले दाबी प्रस्तुत गरेका छन् । गृहमन्त्री बालकृष्ण खाँणले यसअघि महामन्त्रीमा आकांक्षा व्यक्त गर्दै आए पनि बैठकमा केही खुलाएका छैनन् ।

डिना उपाध्याय, पार्वता डिसी र अम्बिका बस्नेतले महिला सहमहामन्त्रीमा दाबी प्रस्तुत गरेका थिए भने किशोर सिंह राठौरले खस आर्य सहमहामन्त्रीमा दाबी प्रस्तुत गरेका थिए ।

मानबहादुर विश्वकर्माले दलित कोटाबाट सहमहामन्त्री, अक्तर कमाल मुसलमान र फरमुल्लाह मन्सुरले मुसलमान कोटाबाट सहमहामन्त्रीले दाबी गरेका थिए । राम जनम चौधरी थारुबाट सहमहामन्त्री, सुनिल थापाले हाल कायम रहेको सहमहामन्त्री, महेन्द्र यादवले मधेसी सहमहामन्त्रीमा दाबी प्रस्तुत गरेका थिए ।

विजय कुमार गच्छदार उपसभापतिमा नै दाबी प्रस्तुत गरेका थिए भने रमेश लेखकले सभापतिबाहेक पदाधिकारीमा दाबी रहने बताए पनि पद भने खुलाएनन् ।

कांग्रेस पदाधिकारीमध्ये एक सभापति, दुई उपसभापति, दुई महामन्त्री, आठ सह महामन्त्रीको निर्वाचन हुने र एक कोषाध्यक्ष निर्वाचित केन्द्रीय सदस्यबाट निर्वाचित हुने पार्टी विधानको प्रावधान छ ।