हतियार सहित चार शिकारी पक्राउ

२३ मंसिर, बर्दिया । बर्दिया राष्ट्रिय निकुञ्ज सुरक्षार्थ तैनाथ नेपाली सेना र निकुञ्जका कर्मचारी सहितको संयुक्त पट्रोल टोलीले हातहतियारसहित चार जनालाई पक्राउ गरेको छ ।

शिकार गर्ने उद्देश्यले निकुञ्ज भित्र आएका बर्दिया जिल्ला, भेरी गंगा नगरपालिका–५, हात्तिखाल बस्ने बर्ष ३७ को लक्ष्मण गिरी, बर्ष ६२ को भद्र बहादुर वली, बर्ष ५६ को ठग बहादुर थापा र बर्ष २२ को ललित घर्तीलाई पक्राउ गरिएको प्रहरीले जनाएको छ ।

उक्त निकुञ्जको हात्तिखालको बबई पाखा ईलाकाबाट उनीहरुलाई ३ नाल भरुवा बन्दुक, ४१ थान बन्दुकको गोली, १५ थान बन्दुकको केप, १०० ग्राम (मसिनो) छर्रा, ३०० ग्राम बारुद, १ थान रेति, ४ थान हँसिया, ३७ थान साईकल छर्रा र ५ थान सलाईसहित पक्राउ गरिएको हो ।

उक्त सामग्रीहरु सहित उनीहरुलाई पक्राउ गरि आवश्यक कारवाहीको लागि बर्दिया राष्ट्रिय निकुञ्ज कार्यालय, बर्दियामा बुझाईएको प्रहरीले जानकारी दिएको छ ।