पौडेल समूहबाट सभापतिको साझा उम्मेदवार छनोट गर्न सकस

२४ मंसिर, काठमाडौं । नेपाली कांग्रेसको रामचन्द्र पौडेल समूहबाट सभापतिको साझा उम्मेदवार छनोटको गर्ने सम्भावना नभएपछि वरिष्ठ नेता रामचन्द्र पौडेललाई नै उम्मेदवार बनाउन प्रस्ताव गरिएको छ ।

यतिका दिनदेखि सहमति गर्न लागी परे पनि प्रकाशमान सिंह र डा. शेखर कोइराला आ—आफ्नो अडानमा नै बसे पछि सहमति सफल हुन नसकेको हो ।

पौडेल पक्षका नेताहरू अर्जुननरसिंह केसी, मिनेन्द्र रिजाल, बलबहादुर केसी, महेश आचार्य, गगन र रामचन्द्र पौडेल सहभागी छलफलमा रामचन्द्र पौडेललाई नै उम्मेदवार बनाउन प्रस्ताव गरिएको थियो ।

यसैबीच नेपाली कांग्रेसका उपसभापति विमलेन्द्र निधिले वरिष्ठ नेता रामचन्द्र पौडेललाई सभापतिमा शेरबहादुर देउवाले प्रस्ताव गरे आफूले समर्थन गर्ने बताएका छन । उनले सभापति देउवाले पौडेललाई सभापतिमा प्रस्ताव गरे आफु बाधक नबन्ने बताएका छन् । सभापति देउवाले पौडेललाई सभापतिमा प्रस्ताव नगरे निधिले सभापतिमा उम्मेदवारी दिने जानकारी गराएका छन् ।

यद्यपि उपसभापति, महामन्त्री र सहमहामन्त्रीका आकांक्षीहरुले भने सहमतिको प्रयास गरि नै रहेका छन् । बिहीबारसम्म सभापतिका दुई आकांक्षी प्रकाशमान सिंह र डा. शेखर कोइराला साझा उम्मेदवार सहमती नभएपछि उनीहरुले वरिष्ठ नेता रामचन्द्र पौडेललाई नै साझा उम्मेदवारका रुपमा अघि सारेर भएपनि अघि बढ्नुपर्ने प्रस्ताव राखेका थिए ।

सभापतिमा साझा उम्मेदवार बनाउने सम्भावना हटेपछि नेताहरुले नयाँ विकल्पमा छलफल थालेका छन् । पूर्वमहामन्त्री प्रकाशमान सिंहले भने पौडेललाई साझा उम्मेदवार मान्न आफू तयार नभएको बताए । पौडेललाई आफूले १३औं महाधिवेशनमै सभापतिमा छाडेकाले यो पटक आफ्नो नाममा सहमति हुनुपर्ने उनको अडान छ । सहमति हुँदैन भने पनि आफूले सभापतिमा उम्मेदवारी दिने उनले बताएका छन् ।

सभापतिमा साझा उम्मेदवार बनाउने सम्भावना नभएपछि नेताहरुले नयाँ विकल्पमा छलफल थालेका छन् । विकल्पको अवस्था सिर्जना भएमा उनीहरु सभापतिका दुबै उम्मेदवार सिंह र कोइरालासँग नजोडिने अवस्था पनि आउन सक्ने जनाईएको छ । यद्यपि सभापतिका आकांक्षी शेखरले भने आफूलाई समर्थन गर्नुपर्ने बताएका छन् । सहमति हुन्छ भने रामचन्द्र पौडेललाई छाड्न आफू तयार भएको यदि सहमति नभएको अवस्थामा आफुलाई सघाउनुपर्ने बताएका छन् ।