प्रजातन्त्र स्थापनासँगै नेपालमा बाह्य हस्तक्षेप बढ्यो : महासचिव मैनाली

२४ मंसिर, काठमाडौं । नेकपा मालेका महासचिव सीपी मैनालीले प्रजातन्त्र स्थापनासँगै नेपालमा बाह्य हस्तक्षेप र प्रभाव बढ्दै गएको बताएका छन् ।

नेपाली कांग्रेसको १४ औं महाधिवेशनको उद्घाटन समारोहमा मैनालीले मुलुकका सामु निकै धेरै चुनौती देखा परेको भन्दै चिन्ता व्यक्त गरे । उनले बीपी कोइरालाको अगुवाइमा प्रजातान्त्रीकरण सुरु भएसँगै बाह्य हस्तक्षेप बढेको बताए । अवाञ्छित हस्तक्षेप र प्रभावले अहिलेसम्म पनि मुलुकले सही दिसा लिन नसकेको उनको भनाई थियो ।

उनले बाह्य हस्तक्षेपलाई समयमै रोक्नुपर्ने बताए । नेपाली कांग्रेसको झण्डामा राष्ट्रियता, प्रजातन्त्र र समाजवाद पनि अंकित रहेको भन्दै उनले राष्ट्रियताप्रति गम्भीर बन्न कांग्रेसलाई सुझाव पनि दिए । उनले मुलुक हिजोभन्दा बढी असंलग्न हुनुपर्ने खाँचो देखिएको पनि चर्चा गरे ।

‘हामीले विदेशीको सहयोग लिनुपर्छ तर सहयोग हाम्रो स्वतन्त्रता र असंलग्नताको मूल्यमा होइन,’ कांग्रेसतिर लक्षित गर्दै उनले भने, ‘प्रजातन्त्रका लागि लड्दै आएको पार्टी, राष्ट्रियता, प्रजातन्त्र र समाजवादलाई आफ्नो झण्डामा लेखेको छ, त्यो पार्टीको ध्यान यतातिर जाओस् ।’