३५५८ मत गन्दा उपसभापतिमा खड्का र गुरुङको अग्रता कायमै

२९ मंसिर, काठमाडौं । नेपाली कांग्रेसको १४ औं महाधिवेशनअन्तर्गत उपसभापति पदतर्फ अहिलेसम्म ३५५८ मत गनिएको निर्वाचन समितिले जनाएको छ । अहिलेसम्मको मत परिणामअनुसार पूर्णबहादुर खड्काको अग्रता कायमै छ । खड्काले १६३४ मत ल्याएका छन् । दोस्रो स्थानमा रहेका धनराज गुरुङले १४३७ मत ल्याएका छन् ।

तेस्रो स्थानमा रहेका विजयकुमार गच्छदारले १४४३  र चौथो स्थानमा चन्द्र भण्डारीले १२५७ रहेका  मत ल्याएका छन् । गुरूङ र भण्डारी सभापतिमा पराजित शेखर कोइराला समूहका हुन्। खड्का र गच्छदार सभापति निर्वाचित शेरबहादुर देउवा समूहका उम्मेदवार हुन् ।

कांग्रेस विधानअनुसार सबैभन्दा बढी मत ल्याउने दुई जना उपसभापति निर्वाचित हुन्छन् । उपसभापतिमा स्वतन्त्र उम्मेदवारी दिएका महेश आचार्यले ४१३ प्रकाशमान सिंह पक्षबाट उम्मेदवारी दिएकी सुजाताले कोइराला  ४३८ र विमलेन्द्र निधि पक्षबाट उम्मेदार बनेकी दिव्यश्वरी शाहले १७२ प्रतिस्पर्धामा धेरै पछाडि छन्।

सोमबार भएको मतदानमा उपसभापति दुई (२) पदका लागि पार्टीका नेता गच्छदार, खड्का, आचार्य, कोइराला, भण्डारी, गुरुङ र शाहले उम्मेदवारी दिएका थिए । जम्मा चार हजार ७४३ मतदातामध्ये चार हजार ६७९ मतदाताले मतदान गरेका थिए ।

कांग्रेस केन्द्रीय कार्यसमितिका पदाधिकारी र सदस्य गरी १३२ पदका लागि मतदान भएको थियो । सभापतिबाहेक अन्य पदको मतगणना कांग्रेस केन्द्रीय कार्यालयमा हुन लागेको हो । उपसभापति पदको मतपरिणाम आएलगत्तै अन्य पदाधिकारी र केन्द्रीय सदस्य पदको मतगणना सुरु गरिने समितिले जनाएको छ ।