यी आठ विकास बैंकले अझै गरेनन लाभांश घोषणा, तीनको बुक क्लोज हुन बाँकी

१ पुस, काठमाडौं । हालसम्म नेप्सेमा सूचीकृत १६ विकास बैंकमध्येमा आठ विकास बैंकले लाभांश घोषणा गरेको छ । हालसम्म महालक्ष्मी, ज्योति, मितेरी, मुक्तिनाथ विकास बैंक, शाईन रेसुंगा, लुम्बिनी विकास बैंक, कामना सेवा विकास बैंक र सांग्रिला डेभलपमेन्ट बैंकले लाभांश घोषणा गरेका छन् ।

हालसम्म सिन्धु विकास बैंक, सप्तकोशी डेभलपमेन्ट बैंक, नारायणी डेभलपमेन्ट बैंक, कर्णाली डेभलपमेन्ट बैंक, ग्रीन डेभलपमेन्ट बैंक, गरिमा विकास बैंक, एक्सेल डेभलपमेन्ट बैंक र कर्पोरेट डेभलपमेन्ट बैंकले गत वर्षको मुनाफाबाट हालसम्म लाभांश घोषणा गरेका छैनन् ।

हालसम्म लाभांश घोषणा गरेका ८ विकास बैंकमध्येमा महालक्ष्मी, ज्योति र मितेरी डेभलपमेन्ट बैंकको बुक क्लोजको मिति तय हुन अझै बाँकि रहेको छ।

लगानीकर्ताले उक्त शेयर किन्दा अझै लाभांश पाउन सक्नेछन् । विकास बैंकहरुमध्ये कामना सेवा विकास बैंकको धेरै लाभांश घोषणा देखिएको छ। यो बैंकले कुल १९ दशमल ४७ प्रतिशत लाभांश प्रस्ताव गरेको छ। जसमा १८ दशमलव ५ प्रतिशत बोनस र ० दशमलव ९७ प्रतिशत नगद लाभांश छन्।

मुक्तिनाथ विकास बैंकले कुल १८ दशमलव ५ प्रतिशत लाभांश घोषणा गरेको छ। जसमा १७ दशमलव ५७५ प्रतिशत बोनस र ० दशमलव ९२५ प्रतिशत नगद लाभांश रहेका छन्।

यसैगरी लुम्बिनी विकास बैंकले १३ दशमलव ७१२ प्रतिशत लाभांश प्रस्ताव गरेको छ। बैंकले १० प्रतिशत बोनस र ३ दशमलव ७१२ प्रतिशत नगद लाभांश प्रस्ताव गरेको छ।

सांग्रिलाले १० प्रतिशत बोनस र ० दशमलव ५२६३ प्रतिशत नगद गरी कुल १० दशमलव ५२६३ प्रतिशत लाभांश घोषणा गरेको छ।शाइन रेसुंगाले १० दशमलव ९३ प्रतिशत बोनस र ० दशमलव ५७ प्रतिशत नगद गरी कुल ११.५ प्रतिशत लाभांश घोषणा गरेको छ।