श्री इन्भेष्टमेन्टको बुक क्लोज मिति तय, लाभांश पाउन कहिलेसम्म बन्ने शेयरधनी ?

८ पुस, काठमाडौं । श्री इन्भेष्टमेन्ट एन्ड फाइनान्स कम्पनीले वार्षिक साधारण सभा पुस २९ गते डाकेको छ । सभामा ११ प्रतिशत लाभांश वितरण गर्ने प्रस्ताव पेश हुनेछ । कम्पनीले आर्थिक वर्ष २०७७–७८ को नाफाबाट ७.७० प्रतिशत बोनस शेयर र ३.३० प्रतिशत नगद गरी कुल ११ प्रतिशत लाभांश लाभांश दिन लागेको हो ।

सभा कम्पनीको रजिष्टर्ड कार्यालय, डिल्लीबजार काठमाडौंमा बिहान ११ बजे सुरु हुनेछ । सभामा अन्य कुनै वित्तीय संस्थाहरु गाभ्न र गाभिन परेमा त्यसको सम्पूर्ण अख्तियारी सञ्चालक समितिलाई दिने प्रस्ताव पनि रहनेछ ।

आर्थिक वर्ष २०७७–७८ को वासलात, नाफा–नोक्सान र नगद प्रवाहमाथि छलफल हुनेछ । आर्थिक वर्ष २०७८–७९ को लागि लेखापरीक्षक नियुक्त गरी पारिश्रमिक निर्धारण गर्ने लगायतका एजेन्डा पनि छन् । सभाको प्रयोजनका लागि कम्पनीले पुस २२ गते बुक क्लोज गर्दैछ । पुस २१ गतेसम्म कायम शेयरधनीले लाभांश सुरक्षित गर्न सक्नेछन् ।