कांग्रेस नेतृत्व डा. शेखरको एजेण्डातर्फ मोडिने संकेत

८ पुस, काठमाडौं । नेपाली कांग्रेसको चौधौ महाधिबेशन धेरै लामो रस्साकस्सी र धेरै लामो प्रतिक्षा पछि सम्पन्न भएको छ । पार्टी सभापतिको मतगणना पछि फेरी पनि शेरबहादुर देउवाले नेपाली कांग्रैसको बागडोर सम्हाल्ने बैधानिक अधिकार प्राप्त गरेका छन् भने नेपाली कांग्रेस अबैधानिक हुनबाट समेत जोगिएको छ ।

नेपाली कांग्रेसको लामो नेतृत्व सम्हाली सकेका बर्तमान नव निर्वाचित सभापति शेर बहादुर देउवालाई अबको नेतृत्व हाँक्न भने त्यति सहज र सजिलो भने पक्कै पनि छैन ।

बिगतमा आफ्नै गुटलाई नेतृत्वमा आसिन गराएर एकलौटी पार्टी सञ्चालन गर्न अभ्यस्त देउवालाई चौधौँ महाधिबेशनबाट नेतृत्वमा उदाएका युवाहरु र उनिहरुमा देश र जनता प्रतिको जिम्मेबारीले बिगतमा झै नेतृत्वलाई एकलौटी र मनमौजी काम गर्न देला भन्ने कसैले पनि अनुमान गरेका छैनन।

नेपाली कांग्रेसको चौधौँ महाधिबेशन युवाहरुका लागि बरदान साबित भएको छ भने युवाहरुले कसरी जिम्मेबारी सम्हाल्लान भन्ने अर्को गहन प्रश्न चिन्ह पनि खडा गरिदिएको छ । भाषण गर्न र नेतृत्वमा रहेर काम गर्नमा फरक पर्ने भएकोले पनि अब युवा नेतृत्वले अत्यन्तै सजगताका साथ आफ्ना एजेण्डाहरु प्रस्तुत गर्नु पर्ने कुरामा ध्यान पुर्याउने नै छ भन्ने आम नेपाली कांग्रेसका नेता तथा कार्यकर्ताहरुले अपेक्षा गरेका छन् ।

देशमा प्रजातन्त्र र लोकतन्त्र आएको दशकौँ बितिसक्दा पनि युवा केन्द्रीत राजनीति स्थापित हुन नसकेको नेपाली कांग्रेसमा अहिले भने नेतृत्व तहमा युवाहरुको बाढी नै आएको छ । यसले पार्टी भित्र जोडदारका साथ उठिरहेको पुस्तान्तरण र संगठन सुदृढिकरणको मुद्धा पनि प्रमूख हुन सक्छ । यसका अलावा युवाहरुको नेतृत्व गरिरहेका पार्टी भित्रका ईमान्दार नेता तथा नेतृत्वको पनि उत्तिकै साथ, सहयोग र समर्थन रहेको कुरालाई पनि बर्तमान नयाँ नेतृत्वमा छाएका युवा नेतृत्वकर्ताहरुले भुल्नु हुदैन भन्ने कुरा महत्वपूर्ण हुन जान्छ ।

बिगतमा देखिएका कांग्रेस भित्रका गुटबन्दीलाई समाप्त पार्दै अब नेपाली कांग्रेस एकताबद्ध भएर अगाडि जान सक्नेस्पष्ट आधारहरु पनि चौधौँ महाधिबेशनको प्रारम्भिक मत परिणामले देखाई सकेको छ ।

देशको मुहार फेर्न सक्छु भन्ने होनहार युवा शक्तिको पार्टीको उपल्लो तहमा देखिएको उपस्थितिले अबको नेपालको आगामी भबिष्य समेत उज्याले हुनसक्ने अनुमान धेरैको रहेको छ । यसका लागि नेतृत्व तहमा देखिएका बिगतका बैचारिक मतभेदहरुलाई न्यूनिकरण र निर्मुलिकरण गर्ने तर्फ नै अहिलेको नयाँ नेतृत्वको पहिलो काम हुनेमा आम कांग्रेस नेता तथा कार्यकर्ताहरुको चाहना रहेको देखिन्छ ।

नेपाली कांग्रेसको चौधौ महाधिबेशनले बिगतमा झै ६० प्रतिशत र ४० प्रतिशतको भागबण्डालाई समाप्त पारेर जाने र जो सक्षम छ, जसलाई आम नेपाली नागरिकहरुले अत्यधिक रुचाएका छन्, जसले पार्टी र संसदीय क्षेत्रमा राम्रो काम गर्न सक्छ उसैलाई अवसर दिने भन्ने सभापतिमा पराजित डा. शेखर कोईरालाको अभिब्यक्तिबाट अब नेपाली कांग्रेसले आफ्नो सांगठनिक अभियान नेतृत्व तहमा देखिएको बहुमत र अल्पमतको संख्याको आधारमा हैन स्पष्ट जनाधार र बिचारको आधारमा हुने कुरामा भने स्पष्ट हुन सकिने आधारहरु तैयार हुदै गैरहेको देखिएको छ ।