सुदूरपश्चिममा थप सातमा कोरोना पुष्टि

८ पुस, बैतडी । सुदूरपश्चिम प्रदेशमा बिहीबार थप सातमा कोरोना भाइरस संक्रमण पुष्टि भएको छ । गएको २४ घण्टामा प्रदेशभर पीसीआर र एन्टीजेन विधिबाट ५६७ को नमूना परीक्षण गर्दा सात जनामा संक्रमण पुष्टि भएको स्वास्थ्य निर्देशनालयले जनाएको छ ।

पीसीआर विधिमार्फत सेती प्रादेशिक अस्पतालमा पाँच र महाकाली अस्पतालमा दुई जनामा कोरोना पुष्टि भएको छ । यस्तै गएको २४ घण्टामा प्रदेशभर चार जनाले कोरोना जितेका छन् ।

उक्त अवधिमा यस प्रदेशमा संक्रमणका कारण एकको पनि मृत्यु भएको छैन । यसअघि बुधबार यस प्रदेशमा नौमा संक्रमण पुष्टि हुँदा पाँच जना निको भएका थिए । सुदूरपश्चिममा संक्रमणका कारण हालसम्म ६१४ को ज्यान गइसकेको छ ।