कुमारी बैंकको १९ करोड कर्जा उठ्यो, बैंकिङ कसुरमा मुद्धा नचल्ने विशेष सरकारी वकिलको निर्णय

१५ पुस, काठमाडौं । नक्कली लालपुर्जा बनाएर १९ करोड ऋण लिने गिरोहबाट कर्जा असुल गर्न कुमारी बैंकको उच्च व्यवस्थापन सफल भएको छ । कुमारी बैंकका सीईओ अनुजमणि तिमिल्सिनाको चलाकीले प्रवाह भईसकेको यति ठूलो परिणामको कर्जा असुलउपर गर्न बैंक व्यवस्थापन सफल भएको हो ।

केन्द्रीय अनुसन्धान व्यूरो (सीआईबी) ले लिखत कीर्ते र बैंकिङ कसुरमा अनुसन्धान गरी रायसहितको प्रतिवेदन दिएकोमा विशेष सरकारी वकिल कार्यालय काठमाडौंले बैंकिङ कसुर सम्बन्धि मुद्धा नचल्ने निर्णय गरेको हो । सो प्रकरणमा आरोपित बैंकका कर्मचारीहरु बैंकिङ कसुर मुद्दा चल्नबाट जोगिएका छन् । बैंकले कर्जा उठाईसकेकोले अवस्था देखिएको भन्दै अघिल्लो बुधबार विशेष सरकारी वकिल कार्यालयले मुद्दा नचलाउने निर्णय गरेको हो ।

सीईओ तिमिल्सिनाको चलाकीपूर्ण निर्णयका कारण उक्त प्रकरणमा बैंकबाट प्रवाह भईसकेको कर्जा रकम समेत सुरक्षित भएको छ । गायक योगेश्वर अमात्यले आफ्नो जग्गाको नक्कली जग्गाधनी प्रमाण पुर्जा तयार गरेको भनी केन्द्रीय अनुसन्धान व्यूरोमा उजुरी गरेको थिए । उक्त उजुरीमा छानविन हुँदा सरकारी वकिल कार्यालयले बैकिङ कसुर मुद्दा समेत आकर्षित हुने देखिदा सो उपर समेत छानविन गर्न व्युरोलाई निर्देशन दिएको थियो । बैंकले अमात्यको उजुरी पर्नु भन्दा अघि नै बैंकबाट प्रवाह भएको कर्जा असुल उपर गरिसकेकोले विशेष सरकारी वकिल कार्यालयले बैकिङ कसुर मुद्दा चलाउन नपर्ने भनि राय व्यक्त गरेको हो।

गायक योगश्वर अमात्यको नाममा रहेको कम्पनीको स्वामित्वमा रहेको जग्गाको नक्कली जग्गाधनी दर्ता प्रमाण पूर्जा बनाई कुमारी बैंक लिमिटेड, न्युरोड शाखाबाट निकालिएको १९ करोड कर्जा बैंकले सो कर्जाको सुरक्षण स्वरुप रहेको धितो कीर्ते रहेको जानकारी प्राप्त गर्नासाथ ऋणीबाट कर्जा असुल उपर गराएको थियो ।

यस कार्यले एकातिर बैंकले सर्वसाधारणको निक्षेप सुरक्षित गरेको छ भने अर्कोतिर आफ्ना कर्मचारीहरु उपर बैंकिङ कसुर मुद्दा चल्नबाट जोगाएको छ । यही प्रकरणपछि बैंकका कामु सीईओ तिमल्सिना र कर्जा प्रमुख मनिष तिमिल्सिना छानविनलाई सहज होस् भनी बिदामा बसेका थिए ।

बैंकका कामु प्रमुख कार्यकारी अधिकृत अनुजमणि तिमिल्सिनाको दुरगामी सोचले गर्दा यस कर्जा प्रकरणमा संम्लग्न कर्मचारीहरु भविष्यमा बैंकले आवश्यक पर्दाको बखत जिम्मेवारीबाट नपन्छिई आफ्ना कर्मचारीहरुलाई संरक्षण गर्ने भरमग्दुर प्रयास गर्ने हुँदा आफूलाई यस कुमारी बैंकमा कर्मचारी भई कार्य गर्न गौरव महशुश भएको यसै प्रकरणमा संम्लग्न एक कर्मचारीले बताए।

“बैंकको कर्जा प्रवाह कार्यमा उच्च व्यवस्थापनको हस्ताक्षर हुँदैमा कुनै व्यक्ति दोषी हुन्छन् नै भन्ने पनि हुँदैन, कसैले प्रक्रियागत रुपमा आएको फाइलमा हस्ताक्षर गरेको र बैंकिङ कसुरमा संलग्न नभएको पनि हुन सक्छ,’ सीआईबीका प्रवक्ता प्रहरी उपरीक्षक श्यामकुमार महतोले भनेका थिए।

यही प्रकरणमा यसअघि केही अभियुक्तविरुद्ध लिखत किर्तेसम्बन्धी मुद्दा दायर भइसकेको छ । जसमा कुमारी बैंकको वीरगन्ज शाखाका कनिष्ठ सहायक सोनु ठाकुर, नक्कली लालपुर्जाका आधारमा कर्जा लिने एसकुमार महर्जन र मुक्तिलाल गौतमलाई जिल्ला अदालत काठमाडौंले पुर्पक्षका लागि थुनामा पठाउने निर्णय गरेको थियो । त्यतिबेला पक्राउ परेका धितो मूल्यांकनकर्ता अजय चौरसियालाई एक लाख रुपैयाँ धरौटीमा छाड्ने आदेश भएको थियो । पक्राउ परेका अर्का अभियुक्त कुशन प्रधान विरुद्ध पनि मुद्दा दायर भईसकेको छ ।

यस्तो थियो कीर्ते काण्ड

अपराधको प्रकृति बैंकिङ कसुरसँग समेत मिल्ने भएको भन्दै यससम्बन्धि अनुसन्धान गर्न जिल्ला सरकारी वकिल कार्यालय, काठमाडौंले निर्देशन दिएपछि सोही आधारमा सीआईबीले थप छानविन गरेको थियो ।

गायक योगेश्वर अमात्यको बाराको विश्रामपुरमा रहेको १२ बिघा जग्गा डेनियल ट्रेडिङ नामक कम्पनीलाई बिक्री गरेको देखाएर नक्कली लालपुर्जा बनाई कुमारी बैंकबाट १९ करोड कर्जा प्रवाह भएको थियो । सो कम्पनीले बैंकको न्युरोड शाखामा कर्जाका लागि निवेदन दिएको थियो । शाखाले धितो मूल्यांकन गरेर पठाउन वीरगन्ज शाखालाई पत्राचार गरेको थियो ।

वीरगन्ज शाखाका कर्मचारी सोनु ठाकुरले धितो मूल्यांकनको नक्कली कागजपत्रमा हस्ताक्षर गरेका थिए । कर्जा दिने अन्तिम निर्णय भने केन्द्रीय कार्यालयबाटै भएको थियो । जसमा बैंकका कर्मचारीद्वय अजित राई र गोपाल जोशीको प्रमुख कमजोरी देखिएपछि उनीहरूविरुद्ध मुद्दा चलाउन प्रहरीले सिफारिस गरेको थियो ।

अमात्यले आफ्नो जग्गाको नक्कली लालपुर्जा राखेर कर्जा प्रवाह भएको सुनेपछि त्यसबारे अनुसन्धानका लागि निवेदन दिएका थिए ।अनुसन्धानको क्रममा उनको जग्गा डेनियल ट्रेडिङ नामक कम्पनीको नाममा देखाएर कर्जा प्रवाह भएको भेटिएको थियो । मालपोत कार्यालयमा भने सो जग्गा अमात्यकै नाममा छ । नक्कली लालपुर्जा भएको खुलेपछि बैंकले अर्को कम्पनी र धितो राखेर सो कर्जा उठाएको थियो। त्यही आधारमा हाल मुद्दा नचलाउने निर्णय भएको हो ।