सप्तकोशी विकास बैंकका डीसीईओ खडकालाई किन जोगाईयो ?

१९ पुस, मोरङ । सप्तकोशी विकास बैंकमा भएको घोटला प्रकरणमा बैंकका सीईओ लगायत केही जिम्मेवार उच्च पदस्थ कर्मचारीहरु पक्राउ परेपनि जोखिम न्युनीकरणको महत्वपूर्ण जिम्मेवारी पाएका नायव कार्यकारी प्रमुख कुमार खड्का अनुसन्धानको दायरामा नपर्नुलाई आश्र्चर्यजनक रुपमा लिएको छ ।

प्रमुख कार्यकारी अधिकृत (सीईओ) नविन सुवेदीसहित बैंकका अप्रेशनल प्रमुख विजय थापा मगर, वित्तीय प्रमुख देवीप्रसाद भण्डारी र जनरल सर्भिस डिपार्टमेन्ट प्रमुख हिमाल भट्टराईलाई प्रहरीले पक्राउ गरेर बैंक घोटला प्रकरणमा अनुसन्धान गरिरहेपनि जोखिम न्युनीकरणको मुख्य जिम्मेवारी पाएका खड्का अनुसन्धानको दायरामा नपर्नुलाई आश्चर्यजनक रुपमा लिइएको हो ।

बैंकका प्रमुख जोखिम अधिकृत खड्का अनुसन्धानको दायरामा नपरेपनि सीईओ सुवेदीसहितका बैंकका जिम्मेवारी चार कर्मचारीहरुलाई प्रहरीले नियन्त्रणमा लिएर केन्द्रीय अनुसन्धान ब्युरोसहित नेपाल राष्ट्र बैंकले अनुसन्धान गर्दै आएको छ । ठूलो आर्थिक अनियमितता घोटाला प्रकरणमा जोखिम नियन्त्रणको जिम्मेवारी पाएका नायव कार्यकारी प्रमुख खड्कालाई अनुसन्धानको दायरामा नल्याएपछि वित्तीय वृत्तमा आशंका गर्न थालिएको छ ।

करिब दुई वर्ष अगाडि सप्तकोशी र काबेली विकास बैंक बीच मर्ज भएर सप्तकोशी विकास बैंक बनेको थियो । मर्जरको समयमा पनि तत्कालीन दुई बैंकका व्यवस्थापन बीीच एकीकरण गर्दै पद तथा जिम्मेवारी बाँडफाँडको क्रममा पनि विवाद सिर्जना भएको स्रोतको भनाइ छ ।

सप्तकोशीबाट आएका प्रमुख कार्यकारी अधिकृत सुवेदी र कावेलीबाट आएका नायव कार्यकारी प्रमुख खड्का बीच आन्तरिक मनमुटाव र कर्मचारी गुटबन्टी हुँदै आएको समेत बुझिएको छ । आर्थिक घोटलाका विषयलाई सम्वन्धित निकायहरुले फराकिलो बनाउँदै दोषी उम्कन दिनु नहुने वित्तीय क्षेत्रका विज्ञहरुको धारणा रहेको छ ।