सांग्रिला डेभलपमेन्ट बैंकको मुनाफा ५८ दशमलव ८९ प्रतिशतले बढ्यो, ईपीएस कति ?

६ माघ, काठमाडौं । सांग्रिला डेभलपमेन्ट बैंक लिमिटेड चालु आर्थिक वर्षको दोस्रो त्रैमाससम्मको अपरिष्कृत वित्तीय विवरण सार्वजनिक गरेको छ। विवरण अनुसार सो अवधिसम्ममा बैंकको मुनाफा उल्लेख्य बढेको छ।

दोस्रो त्रैमाससम्ममा बैंकले २६ करोड १८ लाख रुपैयाँ मुनाफा गरेको छ। यो गत आर्थिक वर्षको सोही अवधिको तुलनामा ५८.८७ प्रतिशत बढी हो।

बैंकको ब्याज आम्दानी ४६.८१ प्रतिशतले बढेर ७९ करोड पुगेको छ । त्यस्तै, खुद फि तथा कमिशन आम्दानी १६.१८ प्रतिशत र सञ्चालन मुनाफा ६८.१६ प्रतिशत बढेको छर समीक्षा अवधिमा बैंकको निष्क्रिय कर्जा २.४३ प्रतिशतबाट घटेर १.१५ प्रतिशतमा झरेसँगै इम्पेरमेन्ट चार्ज ७४.७८ प्रतिशत घटेको छ। सो अवधिसम्ममा बैंकको वितरण योग्य मुनाफा १८ करोड ४ लाख रुपैयाँ रहेको छ।

मुनाफासँगै बैंकको प्रतिशेयर आम्दानी अर्थात ईपीएस पनि बढेको छ। समीक्षा अवधिमा बैंकको यस्तो आम्दानी १२ रुपैयाँ ४ पैसाबाट बढेर १७ रुपैयाँ ३९ पैसा पुगेको छ। सो अवधिसम्ममा बैंकको मूल्य आम्दानी अनुपात १५.९ गुणा रहेको छ भने प्रतिशेयर नेटवर्थ १३० रुपैयाँ ९७ पैसा रहेको छ।

बैंकको चुक्ता पूँजी १० प्रतिशत बढेर ३ अर्ब १ करोड पुगेको छ । जगेडा कोष ४.४१ प्रतिशत घटेर ७२ करोड पुगेको छ। सो अवधिमा बैंकको निक्षेप ९.८८ प्रतिशतले बढेर ४५ अर्ब र कर्जा २२.४४ प्रतिशत बढेर ४० अर्ब पुगेको छ।