आजदेखि सार्वजनिक ठाउँमा खोप कार्ड अनिवार्य, नागरिक चेपुवामा

७ माघ, काठमाडौं । सरकारले आजदेखि सार्वजनिक ठाउँमा कोरोनाविरुद्धको खोप कार्ड अनिवार्य गर्ने भएको छ । सरकारी नियमअनुसार अब कार्यालय, होटल, रेस्टुरेन्ट, सिनेमा हल, रङ्गशाला, हवाई यात्रा, पार्कजस्ता सार्वजनिक ठाउँमा जाँदा खोप लगाएको कार्ड वा कार्डको फोटो देखाउनुपर्नेछ ।

आजदेखि लागू हुने गरी सरकारले यो नियम लगाउने निर्णय गरेलगत्तै खोप लगाउनेहरुको सङ्ख्या पछिल्लो समय बढेको छ । तर सरकारले खोप केन्द्रमा भिड व्यवस्थापन गर्न सकेको छैन जसका कारण जोखिम त्यस्तै छ । कोरोनाविरुद्धको खोप अभियान सञ्चालन भएको करिब १ वर्ष पुग्न लाग्दासम्म पनि कुल जनसंख्याको ३७ प्रतिशतले मात्रै पूर्ण मात्रा खोप पाएका छन् ।

सञ्चालित खोप अभियान प्रभावकारी बनाउन र नागरिकको घरदैलोमा सरकार पुग्न सकेको छैन । तर सार्वजनिक सेवा लिन खोप लगाएको कार्ड अनिवार्य सरकारले गरेकाे छ । यसले नागरिक चेपुवामा परेका छन् । खोप केन्द्र नथपिँदा केन्द्र नै संक्रमणस्थल जस्तो बन्न थालेकाले टोलटोलमा खोप पुर्याउनुपर्ने विज्ञहरुको बताउदै आएका छन् ।

स्वास्थ्य मन्त्रालयका अनुसार अहिले कुल जनसङ्ख्याको ५३ प्रतिशतले एक मात्रा र ४१ दशमलव ४ प्रतिशतले पूर्ण मात्राको खोप लगाएका छन् । यसैगरी लक्षित जनसङ्ख्यामध्ये ८० दशमलव ९ प्रतिशतले एक मात्रा र ६३ दशमलव १ प्रतिशतले पूर्ण खोप लगाएका छन् ।

स्थानीय तहको सक्रियता अभावले एकातिर चाहेर पनि नागरिकले खोप लगाउन पाएका छैनन । अर्को तिर खोप लगाएको कार्ड विना सार्वजनिक सेवा लिन नपाउने व्यवस्थाले दोहोरो मारमा पार्ने प्रष्ट छ ।

पहुँचका आधारमा भित्रभित्रै बुस्टर डोज खोपलाई समेत पहिलो मात्रा भन्दै लगाएकाले पनि एकमात्रा लगाउनेको संख्या बढेको छ । एकतिर खोप थन्किएर विग्रने जोखिम हुनु र अर्कातिर खोप लगाउन नपाएर बढेको जोखिमतर्फ सरकारले थप सक्रियता देखाउन आवश्यक छ ।