राससको मधेश प्रदेशस्तरीय अभिमुखीकरण कार्यक्रम सुरु

१६ माघ, जनकपुर । राष्ट्रिय समाचार समिति (रासस) को मधेश प्रदेशस्तरीय दुई दिने अभिमुखीकरण कार्यक्रम आजदेखि जनकपुरधाममा सुरु भएको छ ।

रासस मधेश प्रदेश कार्यालय जनकपुरधामको समन्वयमा प्रदेश सरकारअन्तर्गतको आमसञ्चार प्राधिकरणको आयोजनामा सुरु भएको उक्त अभिमुखीकरण कार्यक्रममा मधेश प्रदेशका आठ जिल्लामा कार्यरत राससका स्थानीय समाचारदाता तथा कर्मचारी सहभागी छन् ।

अभिमुखीकरण कार्यक्रममा राससका महाप्रबन्धक सिद्धराज राई, नायब महाप्रबन्धक राजु शाक्य, कार्यकारी व्यवस्थापक उत्तम सिल्वाल, प्रमुख समाचारदाता कृष्ण अधिकारी र कार्यकारी सम्पादक शीतल महतोले राससको अवस्था, समाचार सङ्कलन, सम्प्रेषण, सम्पादनसहित कार्यसम्पादन प्रक्रिया, रासस शैली, राससमा पत्रकारिता गर्दा ख्याल गर्नुपर्ने विषयवस्तुलगायत विषयमा सहजीकरण गर्ने कार्यक्रम छ ।

राससको सम्पादन कक्ष, रिपोर्टिङ र व्यवस्थापनमा सुधार गर्नुपर्ने विषयमा समूहगत छलफल हुने रासस प्रदेश कार्यालयले जनाएको छ । यस्तै अभिमुखीकरण कार्यक्रममा राससमा फोटो पत्रकारिता, मधेश प्रदेशमा राससको प्रभाव, मधेश प्रदेश सरकारले गरेका काम र रासससँगको अपेक्षा तथा मधेश प्रदेशमा उठान गर्नुपर्ने विषयमा प्रदेशसभा सदस्य तथा नेपाल पत्रकार महासङ्घ धनुषाका पूर्वसभापति रामआशिष यादव, आमसञ्चार प्राधिकरणका अध्यक्ष श्यामसुन्दर यादव र राससका फोटो पत्रकार प्रदीपराज वन्तले पनि सहजीकरण गर्ने कार्यक्रम तय भएको छ ।

अभिमुखीकरण कार्यक्रमको समापनमा मधेश प्रदेशका मुख्यमन्त्री लालबाबु राउतले सम्बोधन गर्ने कार्यक्रम छ ।
–––