महालक्ष्मी लाइफ इन्स्योरेन्सको कस्तो छ वित्तीय अवस्था ?

२४ माघ, काठमाडौं । महालक्ष्मी लाइफ इन्स्योरेन्सले चालु आवको दोस्रो त्रैमासिक रिपोर्ट सार्वजनिक गरेको छ । विवरण अनुसार कम्पनीको मुनाफा गत आर्थिक वर्षको सोही अवधिको तुलनामा बढेको छ।

दोस्रो त्रैमाससम्म आइपुग्दा ५ करोड ३० लाख रुपैयाँ मुनाफा गरेको छ । यो मुनाफा गत वर्षको भन्दा २.१७ प्रतिशत धेरै हो । गत वर्ष कम्पनीले ५ करोड १९ लाख रुपैयाँ मुनाफा गरेको थियो । यता, कम्पनीले खुद बिमा शुल्क भने ४३।६२ प्रतिशतले बढाएर ६७ करोड ९१ लाख रुपैयाँ पुर्याएको छ ।

गत वर्ष यसले ४७ करोड २८ लाख रुपैयाँ खुद बिमा शुल्क आर्जन गरेको थियो । पुस मसान्त सम्म आइपुग्दा महालक्ष्मीले जीवन बिमा कोष ५२।६६ प्रतिशतले बढाएर १ अर्ब ७३ करोड रुपैयाँ पुर्याएको छ । गत वर्ष यसको जिवन बिमा कोषमा १ अर्ब १३ करोड रुपैयाँ रहेको थियो । हाल यसको चुक्ता पुँजी १ अर्ब ४० करोड रुपैयाँ रहेको छ भने जगेडा कोषमा २० करोड २८ लाख रुपैयाँ छ ।

महालक्ष्मीले नियामक बिमा समितिले तोकेको न्यूनतम पुँजी २ अर्ब पुर्याउन अब ६० करोड रुपैयाँ बराबरको ६० लाख कित्ता आइपीओ जारी गर्नुपर्ने हुन्छ । यसअवधिमा इन्स्योरेन्सले ७ करोड ६४ लाख रुपैयाँ कुल दाबी भुक्तानी गरेको छ । भुक्तानी हुन बाँकी रकम ५ लाख ९३ हजार रुपैयाँ रहेको छ ।