भारतका चर्चित गायक तथा संगीतकार बप्पी लहरीको निधन

४ फागुन एजेन्सी । भारतका चर्चित गायक तथा संगीतकार बप्पी लहरीको निधन भएको छ ।

मंगलबार राति अचानक स्वास्थ्यमा समस्या देखिएपछि मुम्बइको एक अस्पताल लगिएका उनको आज बुधबार बिहान ७० वर्षको उमेरमा निधन भएको हो । भारतको रङ्गिन दुनियाँमा ‘बप्पी दा’ को नामले परिचित लहरीको जन्म सन् १९५२ मा कलकत्तामा भएको थियो ।

सांगीतिक माहौल भएको परिवारमा उनको जन्म भएको थियो । बप्पीका पिता अपरेश लहरी प्रसिद्ध बंगाली गायक थिए भने आमा बनसरी प्रसिद्ध शास्त्रीय संगीतकार थिए । १९ वर्षको उमेरदेखि नै संगीत निर्देशकको काम सुरु गरेका बप्पी दाले सन् १९७२ मा बंगली फिल्म ‘दादू’ मा पहिलो पटक संगीत दिएका थिए ।

बलिउडका सयौं फिल्मका चर्चित गीतहरुमा संगीत दिएका बप्पी लहरीलाई भारतको डिस्को बादशाह समेत भनिन्थ्यो ।