नेपाल प्रेस युनियनको महाधिवेशन तत्काल घोषणा गर्न माग

४ फागुन, काठमाडौं । लोकतन्त्रवादी पत्रकारहरुको छाता संस्था नेपाल प्रेस युनियनको महाधिवेशन तत्काल घोषणा गर्न पत्रकारहरुले माग गरेका छन् । प्रेस युनियन आवद्ध पत्रकारहरुको भेलाले तत्काल महाधिवेशनको मिति तोक्न केन्द्रीय समितिसँग माग गरेको हो ।

प्रेस युनियन काठमाडौं शाखाका पूर्व अध्यक्ष नकुल अर्यालको संयोजनमा भएको भेलाले कुनै बाहनाबाजी नगरी चैत दोस्रो हप्ताभित्र सम्पन्न हुने गरी महाधिवेशनको मिति तोक्नुपर्ने निर्णय गरेको हो । भेलाले युनियनको महाधिवेशन सुनिश्चित गराउन चरणबद्ध दवाव अभियान सञ्चालन गर्ने निर्णय समेत गरेको छ ।

भेलामा प्रेस युनियनका सल्लाहकार शिव लम्साल, उपमहासचिव सलोजा दाहाल, सचिव खिला कार्की, केन्द्रीय सदस्यहरु दीलीप पौडेल, माधव चम्लागाई, रमेश वाग्ले र युवराज गौतम, काठमाडौं जिल्ला सभापति जगन्नाथ दुलाल, सिन्धुपाल्चोक जिल्ला सभापति दुर्गा आचार्य र ओखलढुंगा जिल्ला सभापति जीवन शर्माको उपस्थिति थियो ।

त्यस्तै प्रेस युनियनका अग्रज नेताहरु ईन्द्र रिजाल, लीलाराज खनाल, कालिका महत, पत्रकार महासंघका केन्द्रीय लेखा समितिका सदस्य मुकुन्द भण्डारी, काठमाडौ जिल्ला सचिव महेश्वर गौतम, सहसचिव अर्जुन डोटेल लगायतको उपस्थिति थियो ।

भेलामा आफ्नो धारणा राख्ने अधिकांशले विगतमा जुनसुकै बाहनाले रोकिएको भएपनि अब अविलम्ब प्रेस युनियनको महाधिवेशन गर्नुपर्नेमा जोड दिएका थिए । प्रेस युनियनको महाधिवेशन पछिल्लो पटक २०७१ साल भदौंमा पोखरामा भएको थियो । सो महाधिवेशनले निर्वाचित गरेको बद्री सिग्देल नेतृत्वको कार्यसमितिको कार्यकाल २०७४ भदौंमा समाप्त भइसकेको छ । युनियनको महाधिवेशन पटक–पटक तोकिएपनि विभिन्न बाहनामा स्थगन हुँदै आएको थियो ।

नेपाली कांग्रेसको शुभेच्छुक संस्थासमेत रहेको युनियनलाई यथाशीघ्र महाधिवेशन गर्न कांग्रेसको कार्यसम्पादन समितिले निर्देशन समेत दिइसकेको छ ।