मोरङमा बलात्कार गरेको आरोपमा प्रधानाध्यापक पक्राउ

५ फागुन, मोरङ। मोरङको धनपालथान गाउँपालिकाको एक विद्यालयका प्रधानाध्यापकलाई बलात्कार गरेको आरोपमा प्रहरीले पक्राउ गरेको छ।

धनपालथान गाउँपालिका–५ बबियाका ४५ वर्षीय कालुराम खवासलाई बलात्कार गरेको आरोपमा पक्राउ गरेको मोरङ प्रहरीका प्रवक्ता डिएसपी दीपक श्रेष्ठले जानकारी दिए। २९ वर्षीय महिलाकै घरमा गएर बलात्कार गरेको आरोप लगेको प्रहरीले जनाएको छ। खवास धनपालथान–५ मा रहेको एकतारा आधारभूत विद्यालयका प्रधानाध्यापक हुन्।

पुस १२ गते राति महिलाको घरमै पुगेर बलात्कार गरेको किटानी जाहेरीका आधारमा खवासलाई पक्राउ गरिएको र खवासविरुद्ध जबरजस्ती करणी कसुरमा अदालतबाट बिहीबार म्याद थप गरी घटनाको अनुसन्धान अघि बढाइएको डिएसपी श्रेष्ठले बताए। महिलालाई बलात्कार गरेर रकमसमेत लुटी फरार भएको जाहेरी परेपछि विद्यालयका प्रधानाध्यापकलाई पक्राउ गरी अनुसन्धान अघि बढाएको प्रहरीले जनाएको छ।