संसदको कार्यसूचीमा परेन एमसीसी, एमालेद्धारा संसदमा नारावाजी

६ फागुन, काठमाडौं । संघीय संसद प्रतिनिधिसभा कार्य व्यवस्था परामर्श समितिको बैठकले प्रतिनिधिसभाको आजको कार्यसूचीमा एमसीसीलाई समावेश नगर्ने निर्णय गरेको छ ।

सभामुख अग्निप्रसाद सापकोटाको अध्यक्षतामा संघीय संसद भवन नयाँ बानेश्वरस्थित शंकर हलमा बसेको वैठकले आजका सार्वजनिक कार्यसूचीमा एमसीसीलाई संसदमा पेश नगर्ने निर्णय गरेको हो ।

प्रमुख प्रतिपक्ष एमालेले बहिष्कार गरेको सो बैठकमा एमसीसी सम्झौता अनुमोदन प्रस्ताव पेश हुने नेताहरूले बताएका थिए । अमेरिकी सहयोग परियोजना मिलेनियम च्यालेन्ज कर्पोरेसन (एमसीसी) संसदमा टेबुल गर्ने कि नगर्ने भन्ने विषयमा सभामुख सापकोटाले आज कार्यव्यवस्था परामर्श समितिको बैठक बोलाएका थिए ।

तर, सत्तारुढ गठबन्धनभित्र सहमति नभएपछि संसद बैठकको कार्यसूचीमा समावेश नगरिएको हो । प्रतिनिधिसभा बैठकमा अहिले एमालेले नारावाजी गरि संसद वैठक अबरुद्ध गरिरहेको छ । प्रतिनिधिसभाको बैठक सुरु भएको छ । बैठक सुरु भएलगत्तै एमालेका सांसदहरू रोष्ट्रम अगाडि उभिएर नाराबाजी गरिरहेका छन् ।

एमाले विभाजनमा सभामुख अग्निप्रसाद सापकोवटाको भूूमिका रहेको भन्दै विरोधमा र आफ्नो पार्टीले कारबाही गरेका १४ जना सांसदलाई पदमुक्त गर्नुपर्ने माग राखेर लगातार एमाले सांसदले संसदमा नाराबाजी गर्दै आएका छन् ।