प्रतिनिधिसभा बैठक आज बस्दै, कार्यसुचीमा परेन एमसीसी

८ फागुन काठमाडौं । प्रतिनिधिसभाको बैठक आज पनि बस्दैछ । प्रमुख प्रतिपक्ष दल नेकपा एमालेको अवरोधका कारण पटकपटक स्थगित हुँदै आएको बैठक दिउँसो १ बजे बस्न लागेको हो ।

संघीय संसद सचिवालयले जारी गरेको सम्भावित कार्यसूचीमा अमेरिकी सहयोग परियोजना एमसिसी भने समावेश गरिएको छैन । सम्भावित कार्यसूचीमा एउटा मात्रै एजेण्डा छ । प्रधानमन्त्री शेरबहादुर देउवाले राष्ट्रिय समावेशी आयोगको प्रतिवेदन २०७७/०७८ पेस गर्ने मात्रै कार्यसूची रहेको हो ।

सत्ता गठबन्धनमा सहमति नजुट्दा एमसीसी टेबल हुन सकेको छैन । सत्ता गठबन्धनमा नेपाली कांग्रेस एमसीसी टेबल गर्नुपर्ने पक्षमा छ । तर, नेकपा माओवादी केन्द्र, एकीकृत समाजवादी पार्टी, राष्ट्रिय जनमोर्चा भने यथास्थितिमा एमसीसी पास गर्न नहुने पक्षमा छन् ।

जनता समाजवादी पार्टी नेपालमा भने एमसीसीको सम्बन्धमा दुई मत छ । सो पार्टीमा संघीय परिषद अध्यक्ष डा.बाबुराम भट्टराई पक्षले एमसीसी पास गर्नुपर्ने पक्षमा जोड दिइरहेको छ । पार्टी अध्यक्ष उपेन्द्र यादव भने अहिलेकै अवस्थामा एमसीसी पास गर्न नहुने अडानमा छन् ।

अमेरिकाले यही १६ फागुनभित्र एमसिसीबारे निर्णय गर्न शीर्ष नेताहरूलाई समय दिएको छ ।