सत्तारुढ गठबन्धनको बैठक आज बस्दै, एमसीसी मुख्य एजेण्डा

८ फागुन काठमाडौं । सत्तारुढ गठबन्धनको बैठक आज बस्दैछ । अमेरिकी अनुदान सहायता एमसीसीलाई संसदबाट अनुमोदनका लागि प्रतिनिधिसभामा टेबल गर्ने विषयमा सहमति जुटाउन बैठक बस्न लागेको हो । प्रधानमन्त्री तथा नेपाली कांग्रेसका सभापति शेरबहादुर देउवा आज बस्ने प्रतिनिधिसभा बैठकमा एमसीसी टेबल गर्ने पक्षमा छन् ।

तर संसद सुचारु गरेपछि तथा दलहरुबीच सहमति भएपछि मात्र यसलाई टेबल गर्नुपर्ने अडानमा माओवादी केन्द्रका अध्यक्ष पुष्पकमल दाहाल र एकीकृत समाजवादीका अध्यक्ष माधवकुमार नेपाल छन् । अर्को घटक जसपाका सङ्घीय परिषद् अध्यक्ष डा. बाबुराम भट्टराईले भने संसद्बाट तत्काल एमसीसी अनुमोदन गर्नुपर्ने बताउँदै आएका छन् ।

बिहीबार साँझ प्रतिपक्षी दल नेपाल कम्युनिष्ट पार्टी एमाले अध्यक्ष केपी शर्मा ओलीसँग छलफल गरी प्रधानमन्त्री देउवाले संसद्को गतिरोध अन्त्य गरी एमसीसी अनुमोदन प्रक्रिया अघि बढाउन आग्रहसमेत गरेका थिए । सहमति अनुसार यही फागुन १६ गतेसम्ममा एमसीसीको समयसीमा रहेको छ । गठबन्धनबीच बिहान १० बजे छलफल हुने बताइएको छ ।

आजको बैठकमा नेपाली कांग्रेस, नेपाल कम्युनिस्ट पार्टी माओवादी केन्द्र, नेपाल कम्युनिस्ट पार्टी एकीकृत समाजवादी र जनता समाजवादी पार्टीका शीर्ष नेताहरू सहभागी हुनेछन् ।