महालक्ष्मी विकास बैंकको स्थगित साधारण सभा फागुन १३ गते बस्दै, के–के छन् एजेण्डा ?

९ फागुन, काठमाडौं । महालक्ष्मी विकास बैंकको साधारण सभा फागुन १३ गते गर्ने भएको छ । सभा नेपाल प्रज्ञा प्रतिष्ठानमा गर्ने जनाएको छ । यस अघि अदालतको आदेशमा २ पटकसम्म बैंकको साधारणसभा रोकिएको थियो । सोही साधारण सभा फागुन १३ गते बोलाएको हो ।

बैंकले पुस २५ गते आइतबारको लागि साधारणसभा आह्वान गरेको थियो । सो सभामा अदालतले निर्वाचनको कार्यक्रम नगर्न आदेश दिएको थियो । तर गणपुरक संख्या नपुगेपछि सो दिनको सभा स्थगित भएर माघ ३ गतेको लागि सभा आह्वान भएको थियो । अदालतको आदेशपछि माघ ३ दिने गतेको लागि तोकिएको सभा पनि स्थगित भएको थियो।

कम्पनीले आर्थिक बर्ष २०७७/७८ को मुनाफाबाट २१ दशमलव ०५ प्रतिशत लाभांश वितरण गर्ने प्रस्ताव गरेको छ। कम्पनीले २० प्रतिशत बोनश शेयर र कर प्रयोजन सहित १ दशमलव ०५२६ नगद लाभांश बितरण गर्ने प्रस्ताव गरेको हो। कम्पनीको साधारणसभाले पारित गरेपछि उक्त लाभांश लगानीकर्तामा बितरण हुनेछ ।

सभामा कम्पनीको अधिकृत पुँजी बढाएर ३ अर्बबाट ८ अर्ब पुर्याउने, ३ जना संस्थापक समुहको र ३ जना सर्वसाधारण शेयरधनी समुहको गरि कुल ६ जना संचालकको निर्वाचन गर्ने, प्रबन्धपत्र र नियमावलीमा आवश्यक संशोधन गर्ने, संचालकको भत्ता वृद्धि गर्ने लगायतका प्रस्ताव पनि सभामा पेश हुने छन् ।

कम्पनीले साधारणसभा प्रयोजनको लागि पुस १३ गते बुक क्लोज गरेको थियो । त्यसकारण पुस १२ गतेसम्म कायम शेयरधनीले मात्र सभामा भाग लिन र प्रस्तावित लाभांश पाउन सक्ने छन् ।