एमसीसी पास गराउन एमाले संसदीय दलको कार्यालयमा देउवा र ओलीबीच वार्ता

१२ फागुन, काठमाडौं । एमसीसी आजैको बैठकबाट पास गर्ने तयारी गरिरहेका प्रधानमन्त्री शेरबहादुर देउवाले अचानक संसद बैठक स्थगित गरि एमाले अध्यक्ष केपी ओलीसँग छलफल थालेका छन् ।

नयाँ बानेश्वरस्थित संसद भवन परिसरमा नै देउवाले एमाले अध्यक्ष केपी ओली, वरिष्ठ उपाध्यक्ष ईश्वर पोखरेल र सुवास नेम्वाङसहितका नेतासँग संवाद गरिरहेका छन् ।

सो बैठकमा कांग्रेसबाट सञ्चारमन्त्री ज्ञानेन्द्रबहादुर कार्की र कांग्रस महामन्त्री गगन थापा सहभागी भएका छन् । गठबन्धन दलमा सहभागीहरुबीच एमसीसीको विषयलाई लिएर किचलो बढेपछि प्रधानमन्त्रीले एमालेको सहयोग लिएर पास गराउने तयारी थालेका हुन् ।

एमसीसी कै लागि प्रधानमन्त्री देउवाले धेरैपटक ओलीसँग संवाद गरिसकेका छन् । देउवाले ओलीसँग वार्ता गरेको एक हप्तामा यो तेस्रोपटक हो । संसद भवन परिसरमा रहेको एमाले संसदीय दलको कार्यालयमा देउवा र एमालेका नेताहरुबीच छलफल भईरहेको हो ।

तर एमालेले सभामुखलाई फिर्ता बोलाउनुपर्ने र नेकपा समाजपादीका १४ सांसदमाथि कारवाही गर्नुपर्ने शर्त राख्दै आएको छ । सत्ता गठबन्धन टुटाउने शर्तमा एमाले एमसीसी पास गर्न तयार रहेको छ ।