प्रधानसेनापति खुला म्याराथनको उपाधि बस्नेतलाई

१४ फागुन काठमाडौं । प्रधानसेनापति खुला म्याराथन प्रतियोगिताको उपाधि कृष्णबहादुर बस्नेतले जितेका छन् ।

सैनिक मुख्यालय जङ्गीअड्डा परिसरको खेलमैदानबाट सुरु भएको ४२.१९५ किलोमिटर दौड आर्मीकै बस्नेतले २ घण्टा १९ मिनेट ५७ सेकेण्डामा पुरा गर्दै उपाधि जिते । उनले नगद ३ लाख रुपैयाँ पुरस्कार पाएका छन् । आर्मीकै खड्गबहादुर खड्का दोस्रो हुँदै २ लाख नगद पुरस्कार पाउँदा सशस्त्र प्रहरी एपीएफका किरणसिंह बोगटी तेस्रो हुँदै १ लाख प्राप्त गरे । बोगटीले नेपालगञ्ज म्याराथन र १३ औं दक्षिण एसियाली खेलकुदमा पनि म्याराथनतर्फ स्वर्ण पदक जितेका थिए ।

शनिबार विहान सैनिक मुख्यालय जङ्गीअड्डा परिसरको खेलमैदानबाट प्रारम्भ भएको म्याराथनसहित विभिन्न चार विधाका दौड प्रतियोगिताको प्रधानसेनापति प्रभुराम शर्माले उद्घाटन गरेका थिए । सैनिक शारीरिक तालिम तथा खेलकुद केन्द्रद्वारा आयोजित प्रतियोगितामा म्याराथन, हाफ म्याराथन, १० किमी दौड र पाँच किमी दूरीको वाकाथन सुरु भएको थियो । सैनिक–नागरिक सम्बन्ध विस्तार गर्ने उद्देश्य रहेको प्रतियोगिताको नारा ‘मनोरञ्जनका लागि खेल’ भन्ने छ ।

प्रतियोगिताअन्तर्गत ४२.१९५ किमी पुरुष म्याराथन, २१ किमी महिला–पुरुष हाफ म्याराथन, सैनिक अधिकृत र सैनिक सहचारी महिला–पुरुषको १० किमी दौड तथा उपत्यकाभित्रका सहायकरथी र सोभन्दा माथिका रथीवृन्द, सैनिक श्रीमती सङ्घका कार्यकारिणी पदाधिकारी सम्मिलित पाँच किमी वाकाथन भएको छ ।