अब दैनिक २५ हजार मात्र रेमिट्यान्स पठाउन पाइने

१८ फागुन, काठमाडौं । नेपाल राष्ट्र बैंकले नेपालबाट नेपालमै पठाइने रेमिट्यान्सको सीमा घटाएको छ । केन्द्रीय बैंकले आजैदेखि लागू हुनेगरी रकम स्थानान्तरणको सीमा घटाएको हो ।

राष्ट्र बैंकले स्वदेश भित्र नगद रकम एक ठाउँबाट अर्को ठाउँमा पठाउने सम्बन्धमा आज एक सूचना जारी गर्दै रेमिट्यान्स कम्पनीका ‘सब एजेन्ट’ वा ‘सब रिप्रिजेन्टेटिभ’हरूले स्वदेशमा कारोबार गर्दा प्रतिव्यक्ति, प्रतिकारोबार प्रतिदिन रु २५ हजारसम्म मात्रै गर्न पाउने व्यवस्था गरेको छ । यसअघि यस्तो आन्तरिक रेमिट्यान्स कारोबारको अधिकतम सीमा रु एक लाखसम्म थियो ।

केन्द्रीय बैंकले विदेशबाट नेपालस्थित सम्बन्धित व्यक्ति वा आफन्तलाई पठाएको रेमिट्यान्स रकम नगदमै भुक्तानी गर्न सकिने सीमामा भने कुनै परिवर्तन नगरिएको जनाएको छ ।