डीएसपी भण्डारीमाथि छानविन शुरु, करोडमाथि अनियमितताको आरोप

१९ फागुन, काठमाडौं । सशस्त्र प्रहरी बल नेपाल नम्बर ४४ गुल्म हेडक्वाटर सिमकोट, हुम्लाका प्रमुख डीएसपी गेहेन्द्र भण्डारीले कर्मचारीको राशनमा करिब एक करोड भन्दा बढी अनियमितता गरेको आरोपमा छानविन शुरु भएको छ । गुल्मका प्रहरी कर्मचारीको राशन भत्ता र सामाग्री खरिदमा डीएसपी भण्डारीले करोडभन्दा बढी अनियमिततामा गरेको आरोपमा बुधबारदेखि छानविन शुरु भएको हो ।

सशस्त्र प्रहरी बलका प्रवक्ता निमित्त एसएसपी कमलप्रसाद तिउसिनाका अनुसार भण्डारीमाथि छानविन शुरु भएको प्रष्ट पारे । उनले सशस्त्र प्रहरीका कनिष्ठ कर्मचारीलाई घर बिदा पठाउँदै उनीहरूको राशनबापत आउने रकम आफूले बुझ्ने गरेको आरोपमा छानविन थालिएकाे बताए । त्यसरी घर बिदामा बस्ने कर्मचारीले अनिवार्यरूपमा कार्यालयकै कर्मचारी ‘कोट मास्टर’को खातामा रकम जम्मा गरिदिने र ती कर्मचारीले डीएसपीलाई बुझाउने गरेका कारण उनीमाथि सशस्त्र प्रहरी मूख्यालयले छानविन शुरु गरेको हाे ।

सो गुल्ममा ९८ जना सशस्त्र प्रहरी कार्यरत छन् । तीमध्ये एक महिनामा करिब ६० जनाका दरले कर्मचारीलाई डीएसपी भण्डारीले बिदामा घर छाड्ने गरेका छन । त्यसरी बिदामा छाड्दा मात्रै कर्मचारीबाट उनले मासिकरूपमा ८ लाख ४० हजार बराबर रकम असुल्ने गरेकाे स्रोतको दावी छ । डीएसपी भण्डारीले कर्मचारीको राशनभत्तामा मात्रै १४ महिनाभित्र एक करोड बराबर अनियमितता गरेको स्रोतले जनाएको छ ।

बिदामा छाडेर कर्मचारीबाट राशन भत्ता असुल्ने मात्र होइन, ब्यारेकभित्र सञ्चालित मेसमा पनि लाखौं रूपैयाँ बराबर अनियमितता गरेको आरोप लागेको छ । कागजीरूपमा कर्मचारीलाई कार्यालयमा हाजिर भएको देखाउने, तर उनीहरूलाई घर बिदामा पठाउने गरेको स्रोतले जनाएको छ । स्रोतका अनुसार प्रायः कर्मचारीलाई भण्डारीले एक महिनादेखि ३/४ महिनासम्म घर बिदामा पठाउने गरेका थिए ।

स्रोतका अनुसार घर बिदामा बस्ने कर्मचारीले प्रतिव्यक्ति मासिक १४ हजार रूपैयाँ कोट मास्टरमार्फत डीएसपी भण्डारीलाई बुझाउने गरेका थिए । डीएसपी भण्डारीले घर बिदामा सशस्त्र प्रहरी निरीक्षक, सशस्त्र प्रहरी नायव निरीक्षक (सई) बाहेक तल्लो तहका कर्मचारीलाई पठाउने गरेको खुलेको छ । सरकारी नियमअनुसार हुम्लामा कार्यरत सशस्त्र प्रहरीले हाल मासिक २१ हजार रूपैयाँ राशनबापतको भत्ता पाउने छन् ।

घर बिदामा बस्ने कर्मचारीले मासिकरूपमा १४ हजार रूपैयाँ अनिवार्य बुझाउने गरेका छन् । यसअघि कर्मचारीको मासिक १८ हजार राशनभत्ता रहेकोमा सरकारले गत साउनबाट बढाएर २१ हजार रूपैयाँ पुर्याएको हो ।

कर्मचारीको राशनभत्ता १८ हजार हुँदा उनीहरूले डीएसपी भण्डारीलाई मासिकरूपमा १२ हजारका दरले बुझाउने गरेका थिए । भण्डारीले गुल्मको नेतृत्व सम्हालेपछि ‘कोट मास्टर’का रूपमा सहायक हबल्दार नवराज केसी, वरिष्ठ हबल्दार सुनिल रेग्मी, हबल्दार गणेश थापाले काम गरेका थिए ।