नेपालका ईट्टाभट्टा व्यवसायीहरुले गुड ब्रिक्स सिस्टम अपनाउँदै

२० फागुन, काठमाडौं । दक्षिण कोरियाली सामग्री प्रविधि कम्पनी, इन्नो सीएसआरले जेबीईको ब्रिक्स नेपालसँग नवीनतम तथा वातावरण मैत्री ईंट्टा बनाउने प्रविधि विस्तार गर्ने सम्झौता गरेको घोषणा गरेको छ । कम्पनीले यसअघि इको ब्रिक र शिवशक्ति होम डेकोरेटिभसँग यस्तै खाले सम्झौता गरेकोमा त्यसलाई निरन्तरता दिदै जेबीईको ब्रिक्स नेपालसँग पनि सम्झौता गरेको हो।

कृष्णमान भुजुले संचालन गरिरहेको जेबीइईको ब्रिक्सले हाल वार्षिक ५ करोड ईंट्टा उत्पादन गर्दै आएको छ । भक्तपुर, मकवानपुर र धादिङमा रहेका ईंट्टाभट्टाबाट जेबीईको ब्रिक्सले माटो पोलेर परम्परागत प्रविधिबाट ईंट्टा उत्पादन गर्दै आएको छ ।

‘जनशक्ति र कोइला अभाव भएपछि मैले ईंट्टा उत्पादनको लागि विकल्प खोजिरहेको थिए, अध्ययनको क्रममा मैले गुड ब्रिक्स सिस्टम फेला पारे, जुन प्रविधिले पोल्नु नपर्ने गरि ईंट्टा उत्पादन गर्दछ’ जेबीईको ब्रिक्सका संचालक भुजुले भने ’यसले नेपालमा देखिएको गुणस्तरीय ईंट्को अभाव हटाउने छ भने नयाँ प्रविधिले ईंट्टा उत्पादन प्रक्रियालाई सरल बनाउनुको साथै ईंट्टाको गुणस्तर पनि बढाउँछ।’

उनले थपे ‘म इन्नो सीीएसआरको प्रविधिसँग काम गर्न तत्पर छु, म आशा गर्छु कि इन्नो सीीएसआर र जेबीईको ब्रिक्सको सहकार्यले नेपालको ईंट्टा उत्पादन उद्योगमा नयाँ आयाम आउने छ।’ कोइलाको मूल्य निरन्तर बढ्दै जाँदा र जनशक्ति समेत अभाव हुँदा नेपालको ईंट्टा उत्पादन उद्योगलाई समस्या भईरहेको छ । गुड ब्रिक्स सिस्टमले यसको समाधान दिदै वातावरण मैत्री प्रविधिबाट गुड सोइल स्टेबलाइजर प्रयोग गरि गुणस्तरीय ईंट्टा उत्पादन गर्दछ।

इन्नो सीएसआरले तयार पारेको गुड सोइल स्टेबलाइजर एउटा केमिकल हो, जसले अन्तर्राष्ट्रिय स्तरको मापदण्ड पुरा हुने गरि ईंट्टामा माटो र सिमेन्टको पकड बनाउन काम गर्दछ । यस प्रविधिमार्फत हाइड्रोलिक मसिनको प्रयोगबाट उद्योग भित्र नै रही हरेक सिजनमा ईंट्टा उत्पादन गर्न सकिन्छ, यसले हरेक ईंट्टामा समान गुणस्तर कायम हुन्छ । साथै यस प्रविधिमा परम्परागत ईंट्टा उत्पादनको तुलनामा १० प्रतिशत जनशक्ति र १० प्रतिशत मात्र जमिन आवश्यक पर्छ भने ईंट्टालाई पोल्नु पनि पर्दैन।

इन्नो सीएसआरका प्रमुख कार्यकारी अधिकृत तथा संस्थापक साम युन्सुक लिका अनुसार गुड ब्रिक उत्पादन प्रविधि नेपालका ईंट्टा उत्पादकहरु माझ लोकप्रिय हुँदैछ। हाल नेपालका २५ वटा ईंट्टा उत्पादकहरु उनीहरुको माटो र मसिन परीक्षणको पर्खाइमा रहेका छन् ।

उनका अनुसार यस प्रविधिले ईंट्टा उत्पादन उद्योगमा देखिएका समस्या समाधान गर्नुका साथै अन्य थुप्रै फाइदा पनि दिएको छ । यसले ईंट्टा उत्पादकलाई धेरै आम्दानी दिएको छ, ग्राहकलाई गुणस्तरीय ईंट्टा उपलब्ध भएको छ, र पुरै देशले स्वच्छ हावा पाएको छ । हाल यस प्रविधिबारे बुझ्न चाहनेको संख्या बढ्दै गएको र त्यसले नयाँ सम्झौता हुने क्रम बढेको कम्पनीले उल्लेख गरेको छ।

के हो इन्नो सीएसआर कम्पनी ?

सन् २००८ मा स्थापना भएको इन्नो सीएसआर प्रभावमुखी प्रविधिको सुरुवात गर्ने एक वैश्विक सामग्री प्रविधि फर्म हो । यसले नवीनतम प्रविधिको माध्यामबाट एशिया र अन्य क्षेत्रमा यथार्थ र सकारात्मक परिवर्तन ल्याउनको लागि कार्य गर्दछ । यस कम्पनी संस्थागत सामाजिक उत्तरदायित्व सम्बन्धि परामर्श प्रदान गर्ने कम्पनीबाट रुपान्तरण भई आफै सामाजिक उत्तरदायित्वको कार्यमा लागि परेको हो ।

लामो समयसम्म विभिन्न क्षेत्र र ठाउँहरुमा काम गरिसकेपछि इन्नो सीएसआरले नेपालमा गुड ब्रिक्स भनिने नवीनतम प्रविधिलाई स्थापित गर्ने कार्यमा लागेको छ । यसले नेपालको ईंट्टा उत्पादन र निर्माण क्षेत्रमा क्रान्ति ल्याउने र वातावरणलाई क्षति नहुने गरि उत्पादकत्व बढाउने छ ।