चिनियाँ विदेशमन्त्रीको नेपाल भ्रमणबारे दाहाल र राजदूत यान्छीबीच छलफल

२५ फगुन, काठमाडौं । चिनियाँ विदेशमन्त्रीको नेपाल भ्रमणबारे नेपाल कम्युनिष्ट पार्टी (माओवादी केन्द्र) का अध्यक्ष पुष्पकमल दाहाल ‘प्रचण्ड’ र चिनियाँ राजदूत होउ यान्छीबीच छलफल भएको छ । राजदूत यान्छी प्रचण्ड भेट्न बुधबार बिहान खुमलटार पुगेकी थिइन् ।

प्रचण्ड र राजदूत यान्छीबीच चीनका विदेश मन्त्री वाङ यीको नेपाल भ्रमण, नेपाल र विश्वको पछिल्लो राजनीतिक अवस्थाबारे छलफल भएको बताइएको छ ।

अहिले विदेश मन्त्री वाङको नेपाल भ्रमणको तयारी भइरहेको छ । परराष्ट्र मन्त्रालय स्रोतका अनुसार यसको दुबैतिर तयारी भइरहे पनि मिति तोक्न बाँकी छ र छिट्टै हुने सम्भावना रहेको छ ।

यसअघि सोमबार परराष्ट्र मन्त्रालयमा आयोजित पत्रकार सम्मेलनमा परराष्ट्र मन्त्री नारायण खड्काले नेपालमा उच्चस्तरीय भ्रमण हुन लागेको बताएका थिए ।

उनले कसको भ्रमण हुन लागेको हो भन्नेबारे जानकारी दिएका थिएनन् । पछिल्लो समय नेपालमा अमेरिकी सहयोग परियोजना एमसिसी पास गर्न बेलामा चीनले सार्वजनिक रूपमै टिप्पणी गरेको थियो ।

एमसीसी पारित भएपछि पछिल्लो समय अमेरिकासँग व्यापार युद्ध गरिरहेको उत्तरी छिमेकी चीनसँग नेपालको सम्बन्ध कसरी अघि बढ्ला भन्ने चासो भइरहेका बेला चिनियाँ विदेश मन्त्री काठमाडौं आउन लागेका हुन् । परराष्ट्र मन्त्रालयले अहिले वाङको भ्रमणमा क्रममा हस्ताक्षर हुने एजेन्डाहरूमा तयारी गरिरहेको छ ।