माधव नेपालको प्रतिवेदन: दक्षिणपन्थी ओलीबाट खतरा, एमसीसीले पार्टी बचाएको निष्कर्स

२५ फागुन, काठमाडौं ।  नेकपा एकीकृत समाजवादीका अध्यक्ष माधवकुमार नेपालले पार्टीको बैठकमा प्रस्तुत प्रतिवेदनमा एमसीसी पास नगरेको भए आफ्नो पार्टीनै धरापमा पर्ने बताएका छन् । उनले अहिलेको गठबन्धन कम्तिमा पनि चुनावसम्म कायम राख्नुपर्ने विषयलाई पनि केन्द्रीय कमिटीमा प्रस्तुत राजनीतिक प्रतिवेदनमा उल्लेख गरेका छन् ।

नेपालले केपी शर्मा ओलीको प्रवृत्ति व्यक्तिवादी, स्वेच्छाचारी, अलोकतान्त्रिक र असहिष्णु भएको उल्लेख गर्दै त्यसलाई दक्षिणपन्थी अवसरवादी धार भनेर किटान गरेका छन् । उनले अहिलेको पाँच दलीय गठबन्धन कायमै राखेर तीन तहको निर्वाचन गर्नुपर्ने धारणा राखेका छन् ।

यस गठबन्धन र सहकार्यलाई कम्तिमा पनि आगामी स्थानीय तहको निर्वाचनसम्म मात्रै होइन प्रतिनिधि सभा र प्रदेश सभाको निर्वाचनसम्म पनि कायम राख्नुपर्ने आवश्यकता भएको उनको भनाई छ । संविधान निर्माणमा सहकार्य गरेका राजनैतिक दलहरुले संविधानको पूर्ण कार्यान्वयनमा पनि सहकार्य गर्नुपर्दछ भन्ने आफ्नो पार्टीको मान्यता रहेको उल्लेख गरेका छन् ।

अध्यक्ष नेपालले आफूहरुले अमेरिकी सहयोग परियोजना एमसीसी सम्झौता पारित गर्न साथ नदिएको भए नेपाली कांग्रेस र नेकपा एमाले मिलेर एमसीसी सम्झौता पारित गर्ने र आफ्नो पार्टीको अस्तित्व नै समाप्त पार्ने जोखिम रहेको पनि बताएका छन् ।

उनले एमसीसीको विपक्षमा रहेको भए सत्तारुढ गठबन्धन तोडेर कांग्रेस र एमालेले एमसीसी जस्ताको तस्तै पारित गर्ने, आफूहरुको १४ सांसदलाई कारबाही गर्ने र पार्टीको अस्तित्व नै समाप्त पार्ने जोखिम रहेको बताएका हुन् ।

‘यदि हामीले यसो नगरेको भए नेका र एमाले मिलेर पाँच दलीय गठबधनलाई तोड्ने, सभामुखलाई हटाउने र हाम्रो पार्टीका १४ जना सांसदलाई कारबाही गर्ने गरी नेका र एमाले मिलेर एमसीसी कम्प्याक्ट जस्ताको तस्तै अनुमोदन गर्ने थिए’ अध्यक्ष नेपालले भनेका छन् ।

उनले प्रतिवेदनमा अघि भनेका छन्, ‘ त्यस्तो अवस्थामा पाँच दलीय गठबन्धन तोडिने, सभामुखलाई हटाइने र हाम्रो पार्टीका १४ सांसदलाई कारबाही गरिने र हाम्रो पार्टीको अस्तित्व समाप्त पारिने र अदालतलाई समेत प्रयोग गर्नेसम्मका कार्य हुन सक्दथे । हामीले वैकल्पिक बाटो रोजेर ति सबै खतरालाई टारेका छौं ।’