हरियो मतपत्रबारे ओलीलाई कांग्रेसको जवाफः ‘हरियो भन्दैमा सारा वनजंगल नै फाँड्न सकिदैन्’

२५ फागुन, काठमाडौं ।  नेपाली कांग्रेसले निर्वाचन आयोगले तयार पारेको मतपत्रको रङप्रति प्रमुख प्रतिपक्ष दल नेकपा (एमाले)का अध्यक्ष केपी शर्मा ओलीले देखाएको असहमतिको कुनै अर्थ नरहेको बताएको छ । कांग्रेसले अध्यक्ष ओलीले हरियो रङमा आपत्ति जनाएकोप्रति आश्चार्य प्रकट समेत गरेको छ ।

निर्वाचन आयोगले मतपत्रमा हरियो रङ राख्न लागेको विषयमा आपत्ति जनाउँदै ओलीले ‘कांग्रेसको रुखको रङ हरियो हुन्छ भन्दैमा मतपत्रमा हरियो रङ राख्न नहुने’ बताएका थिए । कांग्रेसले यसमा ओलीको भनाइले कुनै अर्थ नराख्ने बताएको छ ।

कांग्रेसले स्थानीय तह निर्वाचन केन्द्रित पहिलो चरणको अभियान घोषणाका लागि बुधबार आयोजित पत्रकार सम्मेलनमा ओलीको टिप्पणीको जवाफ फर्काएको हो । ओलीको टिप्पणीले कांग्रेस बहुमतमा आउँदै छ भन्ने संकेत गरेको भन्दै जनताबाट प्राप्त हुने मतबाट नआत्तिन पनि ओलीलाई आग्रह गरिएको छ ।

मतपत्रमा राखिने हरियो रङमा नै आपत्ति हुने हो भने नेपालको सारा वनजंगल नै फाँड्नुपर्ने हुन्छ भन्दै कांग्रेस प्रवक्ता डा. प्रकाशरण महतले ओलीको अभिव्यक्तिले कांग्रेस बहुमतमा आउँने संकेत गरेको बताए । उनले जनताबाट प्राप्त हुने मतका लागि कसैले पनि आत्तिने वा मात्तिने काम गर्न नहुनेमा जोड दिए ।