मेयरका छोराविरुद्ध डेढ करोड ठगी गरेको उजुरी दर्ता, पक्राउ पुर्जी जारी

२७ फागुन, काठमाडाैं ।  घोराही उपमहानगरपालिकाका मेयर धनश्याम पाण्डेका छोराविरुद्ध डेढ करोड ठगेको भन्दै प्रहरीमा उजुरी दर्ता भएको छ ।

डेढ करोड ठगी गरेको आरोपमा मेयर पाण्डेका छोरा निर्माण व्यवसायी अनुप पाण्डेविरुद्ध जिल्ला प्रहरी कार्यालय दाङमा उजुरी दर्ता भएको हो ।

घोराही उपमहानगरपालिका–१५ भरतपुरका व्यवसायी गेहेन्द्र बस्नेतले निर्माण व्यवसायी अनुप पाण्डेले आफूबाट डेढ करोड रुपैयाँ ठगी गरेको भन्दै प्रहरीमा उजुरी दिएका हुन्।

जिल्ला प्रहरी प्रमुख एसपी सुरेशप्रसाद काफ्लेले घोराही–तुलसीपुर सडक निर्माणको क्रममा टिपर प्रयोग गरेको र भाडा तथा इन्धनबापतको रकम एक करोड ४४ लाख रुपैयाँ नदिएको भन्दै बस्नेतले पाण्डेविरुद्ध ठगी मुद्दामा उजुरी दिएको बताए।

पाण्डेविरुद्ध पक्राउ पुर्जीसमेत जारी गरिएको प्रहरी स्रोतले जनाएको छ ।