स्वतन्त्रताको नाममा अनियन्त्रित ढंगले छाडापन मौलायोः अध्यक्ष ओली

२७ फागुन, पोखरा । नेकपा एमाले अध्यक्ष केपी शर्मा ओलीले स्वतन्त्रताको नाममा पछिल्लो समय बढी अनियन्त्रित र छाडापन मौलाएको बताएका छन् । प्रेस चौतारी नेपालको नवौँ राष्ट्रिय सम्मेलनलाई शुक्रबार पोखरामा उद्घाटन गर्दै ओलीले आजको सञ्चार क्षेत्रले उपलब्धिलाई सही ढंगले सदुपयोग गर्न नसकेको बताए ।

उनले सञ्चारमाध्यमदेखि सामाजिक सञ्जालसम्म छाडापन देखिएको भन्दै आवश्यकता भन्दा बढी अनियन्त्रित र छाडा हुँदा स्वतन्त्रताको सदुपयोग हुन नसक्ने स्थिति देखिएको र आजको सञ्चार क्षेत्रले उपलब्धिलाई सही ढंगले सदुपयोग गर्न सक्नुपर्छने बताए ।

ओलीले नेपालमा शासकले प्रेस र सञ्चारलाई संगठित रुपमा प्रयोग गर्न नसकेको उल्लेख गरे । देशमा प्रेस र प्रेस स्वतन्त्रताको इतिहास लामो नरहेको बताउँदै उनले राणाकाल र राजाको शासन हुँदासम्म प्रेस स्वतन्त्रता नफक्रिएको बताए ।

नेपाली काँग्रेसले भागेको राजा काँधमा बोकेर ल्याएको उल्लेख गर्दै कांग्रेसले कहिले पनि राजाको विरोध नगरेको उल्लेख गरे । उनले २०४६ पछि मात्रै प्रेस स्वतन्त्रताको उपभोग गर्न पाइएको बताए ।

ओलीले प्रेस स्वतन्त्रता भनेको स्वतन्त्रतासम्बन्धी मानवीय चेतनासँगको विषय भएको बताउँदै मानवजातिको विकास हुँदादेखि नै सञ्चार रहेको र सञ्चारको रुप विकास हुँदै आधुनिकताको अहिलेको अवस्थामा आइपुगेको बताए ।