१५ लाख बढीले बुस्टर डोज खोप लगाएको मन्त्रालयको दावी

 २७ फागुन, काठमाडौं ।  स्वास्थ्य मन्त्रालयले नेपालमा कोरोनाभाइरस (कोभिड–१९) विरुद्धको बुस्टर डोज खोप १५ लाख बढीले लगाएको जनाएको छ । स्वास्थ्य मन्त्रालयका अनुसार १५ लाख ९२ हजार १७४ जनाले बुस्टर डोज लगाएका हुन् ।

बुस्टर डोज खोप पूर्ण मात्रा खोप लगाएको ६ महिनापछि अनिवार्य रुपमा लगाउन मन्त्रालयले आग्रह गरेको छ । यस्तै नेपालमा कोरेनाविरुद्धको खोप अभियान सुरु भएको १४ महिनासम्ममा कुल जनसङ्ख्याको ६२.९ प्रतिशतले खोपले लगाएका छन् ।

स्वास्थ्य मन्त्रालयका अनुसार दुई करोड ९१ लाख ९२ हजार ४८० जनसङ्ख्या मध्ये ३ करोड ८५ लाख ४७ हजार ७४९ मात्रा खोप लगाइएको छ ।

जसमा कम्तीमा एक मात्रा एक करोड ८६ लाख ३ हजार ४५४ जनाले लगाएका छन् । पूर्ण मात्रा एक करोड ८३ लाख ५२ हजार १२१ जनाले लगाइसकेकाले कुल जनसङ्ख्याको ७४ं.५ प्रतिशतले कम्तीमा एक मात्रा, पूर्ण मात्रा ६२.९ प्रतिशतले लगाएका छन् ।