चैतमा ब्याजदर यथावत रहने

२९ फागुन, काठमाडौं । चैतमा वाणिज्य बैंकहरुबीच ब्याजदर नबढाउने सहमति भएको छ । नेपाल बैंकर्स संघको बैठकले चैतमा ब्याजदर नबढाउने सहमति गरेको हो ।

जसअनुसार चैतमा पनि वाणिज्य बैंकहरुको बचतको ब्याजदर फागुन महिनाकै यथावत रहन्छ । फागुन महिनामा बैंकहरुले व्यक्तिगत मुद्दति निक्षेपमा अधिकतम ११.०३ प्रतिशत र संस्थागत मुद्दति निक्षेपमा १०.०३ प्रतिशत ब्याजदर दिइरहेका छन् । त्यस्तै, बचतमा ५ प्रतिशत र कल निक्षेपमा ३.१५ प्रतिशत सम्म दिइरहेका छन् ।

राष्ट्र बैंकको नियमअनुसार अर्को महिना लागू हुने ब्याजदर यो महिनाकै अन्तिम दिन प्रकाशित गर्नुपर्छ । केन्द्रीय बैंकको नियमअनुसार आगामी महिनाको ब्याजदर प्रकाशित गर्दा विद्यमान ब्याजदरमा १० प्रतिशत भन्दा बढीले बढाउन पाइने छैन । माघको भन्दा फागुनमा बैंकहरुले १० प्रतिशतले ब्याजदर बढाएका थिए ।