समयमै अन्तर्वार्ता नगराएको भन्दै लोक सेवामा नासुको धर्ना

 २९ फागुन, काठमाडौं ।   समयमै अन्तर्वार्ता नगराएको विरोधमा लिखित परीक्षामा उत्तीर्ण भएका नायब सुब्बाका उम्मेदवारहरूले लोक सेवा आयोगमा धर्ना दिएका छन् । उनीहरूले आइतबार लोक सेवा आयोगको केन्द्रीय कार्यालयमा पुगेर अन्तर्वार्ताको माग गर्दै धर्ना दिएका हुन् ।

गत भदौमा लिखित परीक्षाको नतिजा प्रकाशित भए पनि अहिलेसम्म अन्तर्वार्ता नहुँदा भविष्य अन्योलमा परेको उनीहरूको भनाई छ । आयोगको ध्यानाकर्षणका लागि धर्ना दिएको उनीहरुले बताए ।

परीक्षामा उत्तीर्ण भएर पनि अन्तर्वार्ता नहुँदा ४÷५ सय नासुको भविष्य अन्योल भएको लिखित परीक्षामा सफल भएकाहरूको भनाई छ । अदालतमा मुद्दा परेपछि गत भदौदेखि नासुको अन्तर्वार्ता रोकिएको थियो ।

अदलतले रोकिएका अन्तर्वार्ता र परीक्षाहरू यथाशीघ्र सञ्चालन गर्न आदेश दिइसके पनि आयोगले काम अघि बढाएको छैन । आयोगले धर्नामा आएका नासुमा नाम निकालेकाहरूलाईे अदालतको आदेश अस्पष्ट भएको भन्दै कानुनी परामर्श गरेर काम अघि बढाउने बताएको छ ।