एमाले संवेदनशील भए दलीय सहमतिमा नागरिकता विधेयक पारित हुन्छः कानुनमन्त्री बडु

 २९ फागुन, काठमाडौं ।  कानुन, न्याय तथा संसदीय मामिलामन्त्री दिलेन्द्रप्रसाद बडुले प्रमुख प्रतिपक्षी दल नेकपा एमाले संसदमा जिम्मेवार भएर प्रस्तुत भए दलीय सहमतिका साथ नागरिकता लगायतका महत्वपूर्ण विधेयकहरु संसदबाट पास गराउन सरकारले चाहिरहेको बताएका छन् ।

उनले एमालेको लगातारको संसद अवरोधका कारण तत्काल आवश्यक रहेका धेरै विधेयकहरु विचाराधीन रहेको बताए । अहिले नागरिकता विधेयक पारित गराउन सहमति आवश्यक भएको बताउँदै एमालेले संसद अवरोध खोले यसमा दलीय सहमति पनि जुट्ने बताए ।

आइतबार प्रतिनिधिसभाको बैठकपछि पत्रकारहरुसँग कुरा गर्दै मन्त्री बडुले महत्वपूर्ण विधेयक दलीय सहमतिबाट संसदमा पेश र पारित गर्नुपर्ने भन्दै एमाले संवेदनशील नभएका कारण रोकिएको बताए ।

धरै विषयहरु दलीय सहमति बनाएर निश्कर्षमा पुर्याउनुपर्ने भएकाले प्रक्रिया अनुसार विधेयकहरु पारित गराउन अरु भन्दा पहिले एमाले संवेदनशील हुनुपर्ने बताए ।

जनताका जल्दाबल्दा समस्या सम्बन्ध विधेयक विचाराधीन रहेको भन्दै उनले ती विधेयकमाथिको छलफलमा एमाले सहभागी हुनुपर्ने बताए । एमाले जिम्मेवार बनेर संसद मार्फत जनताप्रतिको उत्तरदायित्व पूरा गर्ने, छलफलमा भाग लिने र सबै विधेयकको छलफलमा एमालेको सहभागिता हुनुपने मन्त्री बडुको भनाई छ ।