स्थानीय सरकार भन्दा चित्त बुझ्छ भने ‘तह’ हटाउन संविधान संशोधन गरौँलाः प्रधानमन्त्री देउवा

२९ फागुन काठमाडौं ।  प्रधानमन्त्री शेरबहादुर देउवाले स्थानीय तहहरुले नाममा भन्दा काममा ध्यान दिन आवस्यक भएको भन्दै नामका विषयमा धेरै चित्त नदुखाउन जनप्रतिनिधिहरुलाई आग्रह गरेका छन् ।

जनप्रतिनिधिहरुले स्थानीय ‘तह’ भन्दा स्थानीय ‘सरकार’ राम्रो हुने भन्दै गुनासो गरेपछि प्रधानमन्त्री देउवाले यसका लागि दलीय सहमति जुटाएर संविधान संशोधन गर्नुपर्ने भएकाले आफु त्यसका लागि तयार रहेको बताए ।

नेपाल नगरपालिका संघको २९ औँ वार्षिकोत्सवका अवसरमा आइतबार काठमाडौंमा आयोजित कार्यक्रममा उनले नगरपालिकाका जनप्रतिनिधिहरूलाई सेवा प्रवाहमा ध्यान दिन अनुरोध गरे । स्थानीय सरकार लोकतन्त्रको पहिलो पाठशाला र जनताको घरदैलोको सरकार भएको भन्दै उलने शब्दमा आपत्ति जनाउन नहुने बताए ।

उनले सबै पार्टीलाई सहमतिमा ल्याएर कहाँ–कहाँ संशोधन गर्ने हो गरौँला तर, मुख्य कुरा काम भएकालले सेवा प्रवाह गरी जनताको दुःख हटाउने काम गर्न आग्रह गरे । जनतालाई प्रत्यक्ष सहभागी गराएर विकास गर्न, नीति निर्माण र कार्यान्वयनमा जनतालाई सहभागी गराउनुपर्नेमा देउवाले जोड दिए ।

विकास निर्माण तथा सेवा प्रवाहको क्षेत्रमा महत्वपूर्ण अधिकार र जिम्मेवारी नगरपालिकाहरूको भएको तथा घरदैलोको सरकार भएकाले स्थानीय तहको भूमिका संवेदनशील भएको उनको भनाइ छ ।