वाणिज्य बैंकहरुमा एकैदिन थपियो ८ अर्ब निक्षेप, सीडी रेसियोमा सुधार

३० फागुन, काठमाडौं । वाणिज्य बैंकहरुले एकै दिन ८ अर्ब रुपैयाँ निक्षेप संकलन गरेका छन् । नेपाल राष्ट्र बैंकका अनुसार वाणिज्य बैंकहरुले फागुन २७ गतेको दिन सो निक्षेप संकलन गरेका हुन् ।

एकैदिन सो ८ अर्ब निक्षेप थपिएसँगै बैंक तथा वित्तीय संस्थाहरुको कुल निक्षेप ४८ खर्ब ९१ अर्ब रुपैयाँ पुगेको छ । गत फागुन २६ गतेसम्म कुल निक्षेप ४८ खर्ब ८३ अर्ब रुपैयाँ रहेको थियो ।

गत फागुन २६ गते वाणिज्य बैंकको कुल निक्षेप ४३ खर्ब १८ अर्ब रुपैयाँ रहेकोमा ८ अर्ब थपिएसँगै निक्षेप बढेर ४३ खर्ब २६ अर्ब रुपैयाँ पुगेको छ । फागुन २७ मा बैंक तथा वित्तीय संस्थाको कर्जा लगानी स्थिर रहँदै ४६ खर्ब ९३ अर्ब रुपैयाँ नै रहेको छ । गत फागुन २६ गतेसम्म कुल कर्जा लगानी ४६ खर्ब ९३ अर्ब रुपैयाँ रहेको थियो ।

वाणिज्य बैंकहरुको कुल कर्जा लगानी पनि स्थिर रहँदै फागुन २७ मा ४१ खर्ब ६६ अर्ब रुपैयाँ रहेको छ । गत फागुन २६ गते पनि कुल कर्जा लगानी ४१ खर्ब ६६ अर्ब रुपैयाँ नै थियो ।

फागुन २७ मा बैंकहरुको औसत सीडी रेसियोमा सामान्य सुधार भएर ९०.४७ प्रतिशत कायम भएको छ । गत फागुन २६ सम्म बैंकहरुको औसत सीडी रेसियो ९०.५४ प्रतिशत थियो ।