अर्घाखाँचीमा तीनै तहको निर्वाचनमा तालमेल गर्ने पाँचदलको घोषणा

३० फागुन, बुटवल ।  सत्ता गठबन्धनमा रहेका दलहरुले जिल्ला तथा स्थानीय तहले पनि गठबन्धनमा जाने निर्णय गर्न सक्ने बताएपछि अर्घाखाँचीमा पाँच दलले ३० वैशाखमा हुने आगामी निर्वाचनमा तालमेलको घोषणा गरेका छन् ।

नेपाली कांग्रेस, नेकपा माओवादी केन्द्र, नेकपा एकीकृत समाजवादी, जनता समाजवादी पार्टी र राष्ट्रिय जनमोर्चाले सोमबार सन्धिखर्कमा पत्रकार सम्मेलन गरी स्थानीय संगै संघ र प्रदेशको चुनावमा तालमेल गरेर जाने घोषणा गरेका हुन् ।

नेपाली कांग्रेसका जिल्ला सभापति केशव श्रेष्ठले संविधान र लोकतन्त्रको रक्षाका लागि स्थानीय, प्रतिनिधिसभा र प्रदेश सभा निर्वाचनसम्म सत्ता गठबन्धनमा आवद्ध पांच दलबीच तालमेल हुने सहमति भएको बताए ।

उनले एमालेले अन्य दललाई मानमर्दन गरेर दम्भ र अहंकार प्रदर्शन गरेकाले सत्ता गठबन्धनलाई चुनावसम्म कायम गर्नुपरेको बताए । माओवादी केन्द्रकी छमकुमारी खनालले नेकपा एमालेका अध्यक्ष केपी शर्मा ओलीको निरंकुशता र तानशाहीको बिरुद्धमा चुनावी तालमेल गर्ने सहमति भएको बताइन् ।

पत्रकार सम्मेलनमा नेकपा एकीकृत समाजवादीका अध्यक्ष रामबहादुर चौहान, जनता समाजवादी पार्टीका जिन्दक खड्का र राष्ट्रिय जनमोर्चाका शेरबहादुर बीसीले गठबन्धन गरेर चुनावमा जाँदा सबै दलको समानुपातिक प्रतिनिधित्व हुने बताए ।